Türkiyənin ilk uçan avtomobili üçün öncədən sifarişlərin qəbuluna başlanılıb
03.10.2025 / Maraqlı məlumatlar
İstanbulda fəaliyyət göstərən “AirCar Texnologiya və Aviasiya” şirkəti tərəfindən hazırlanmış, Türkiyənin yerli istehsalı olan uçan avtomobil “AirCar” sifarişləri öncədən qəbul etməyə başlayıb. Nəqliyyat vasitəsinin 2027-ci ildə ilk 100 ədədinin təhvil verilməsi gözlənilir.
AZƏRTAC xəbər verir ki, 2020-ci ildən etibarən hazırlanmasına başlanılan “AirCar” may ayında ilk insanlı uçuş sınağını uğurla həyata keçirib.
İki sərnişin üçün nəzərdə tutulan uçan avtomobil 15 dəqiqədə sürətli şarj ola bilir. 80 kilometr uçuş məsafəsi, maksimum 130 kilometr-saat sürətə malik “AirCar” tam elektrik mühərriklidir və 250 kiloqram yükdaşıma qabiliyyətinə malikdir.
İstehsal payının 85 faiz Türkiyəyə məxsus bu nəqliyyat vasitəsində nasazlıq zamanı avtomatik açılan ballistik paraşüt, mümkün qəzaların qarşısının alınması sistemi və 400V şarj cihazı yer alır. Ağ, qırmızı, boz, mavi və qara rəng seçimləri ilə təqdim olunan uçan avtomobil üçün 2 il və ya 500 uçuş saatı zəmanət təklif olunur. 2027-ci ildə təhvil veriləcək ilkin məhsullar üçün 250 dollar ödəniş ilə rezervasiya etmək mümkündür.
Qeyd edək ki, 10 min fut (təxminən 3 min metr) hündürlüyə qalxa biləcək və yüngül idman təyyarəsi (LSA) kateqoriyasında sertifikatlaşdırılacaq “AirCar”ı idarə etmək üçün LSA pilot lisenziyası tələb olunacaq. İlk 1000 sifariş üçün şirkət bu lisenziya üzrə pulsuz təlim də təklif edir.
