NASA nüvə tullantılarından kosmik batareyaları gücləndirmək üçün istifadə edəcək
06.10.2025 / Maraqlı məlumatlar
ABŞ-ın "Zeno Power" şirkəti kosmik batareyalar üçün yeni enerji mənbəyi kimi amerisium-241 (Am-241) izotopundan istifadə etməyi planlaşdırır.
Bu izotopdan hazırlanacaq radioizotop enerji sistemləri NASA-nın lunoxodlarını, eniş aparatlarını və Ay infrastrukturunu enerji ilə təmin edəcək.
İzotopu Fransanın nüvə şirkəti "Orano" təchiz edəcək. Şirkət amerisiumu La Haaqa şəhərindəki nüvə tullantılarının emalı zavodunda əldə edəcək. Tərəflər bu istiqamətdə çoxmilyonluq müqavilə imzalayıblar.
İndiyədək kosmosda əsasən plutonium-238 (Pu-238) istifadə olunurdu, lakin məhdud ehtiyatlar yeni alternativ axtarışlarını sürətləndirib. Amerisium-241 isə 430 ildən çox yarımparçalanma dövrü sayəsində onilliklərlə sabit enerji təmin edə bilir.
"Zeno Power" bildirir ki, amerisium-241 kosmik, stronsium-90 isə dəniz və yer sistemlərində istifadə olunacaq. Bu yanaşma şirkətə “dərin dənizdən dərin kosmosa qədər” fəaliyyət imkanı yaradacaq.
