OpenAI süni intellekt agentlərinin dəqiqələr ərzində yaradılmasına imkan verən AgentKit alətini istifadəyə verib
09.10.2025 / Maraqlı məlumatlar
OpenAI şirkəti Dev Day 2025 adlı tədbirdə müxtəlif mürəkkəblik səviyyəli tapşırıqlar üçün süni intellekt agentlərinin hazırlanmasını və yerləşdirilməsini sadələşdirmək məqsədi daşıyan yeni alət - AgentKit-i təqdim edib. Şirkətin rəhbəri Sam Altman bildirib ki, AgentKit - OpenAI platformasının tək interfeysində birləşdirilmiş vahid komponentlər toplusudur və bu, müstəqil istifadəçi agentlərinin daha sürətli yaradılmasına və optimallaşdırılmasına kömək edəcək. OpenAI-nin bloqunda qeyd olunur ki, bu alət bir neçə mühüm moduldan ibarətdir. Birincisi - Agent Builder-dir. Altman onu “agentlər yaratmaq üçün Canva” kimi təsvir edib.
Bu modul vizual şəkildə məntiqin, mərhələlərin və ideyaların dizaynını təmin edir və hal-hazırda bir çox tərtibatçı tərəfindən istifadə olunan Responses API əsasında qurulub. İkinci modul ChatKit adlanır. O, sadə şəkildə tətbiqlərə inteqrasiya oluna bilən daxili çat interfeysi təqdim edir. Tərtibatçılar bu interfeysi öz tətbiqlərinə daxil edə, həmçinin veb-saytlarda yerləşdirə və məhsulun mövzusu və ya şirkət brendinə uyğun şəkildə tənzimləyə bilərlər. Üçüncü modul - Evals for Agents adlanır. O, süni intellekt agentinin performansını ölçür və onun ümumi davranışını, eləcə də ayrı-ayrı komponentlərini çoxsaylı məlumat dəstləri əsasında qiymətləndirir. AgentKit həmçinin OpenAI konnektorlar reyestrinə çıxış imkanı yaradır.
Bu, tərtibatçılara agentləri daxili alətlərə və üçüncü tərəf sistemlərinə təhlükəsiz şəkildə qoşmağa imkan verir. Bütün bu proses idarəetmə paneli vasitəsilə həyata keçirilir və tam nəzarətlə təhlükəsizlik qorunur. İstifadə rahatlığını nümayiş etdirmək üçün OpenAI mühəndisi Christina Huang Dev Day səhnəsində canlı yayım zamanı cəmi 8 dəqiqədən az müddətdə tam funksional iş prosesi və iki süni intellekt agenti yaratdı. Sam Altman əlavə edib ki, AgentKit, OpenAI komandasının ilk agentlərini hazırlayarkən çatışmayan bütün elementləri özündə birləşdirir. O həmçinin bildirib ki, şirkət artıq bir sıra tərəfdaşlarla müqavilələr bağlayıb və bu tərəfdaşlar yeni alətin köməyi ilə agentlərin tətbiqi və miqyaslandırılması prosesinə başlayıblar.
