Dünyanın ilk aktiv termorequlyatorlu kompüter siçanı təqdim edildi
15.10.2025 / Maraqlı məlumatlar
Geymer avadanlıqları istehsal edən "Black Shark" şirkəti kataloquna qeyri-adi xüsusiyyətlərə malik yeni simsiz kompüter siçanı - "Star Flash Cool and Warm Gaming Mouse" modelini əlavə edib.
Oxu.Az ithome.com saytına istinadən xəbər verir ki, bu siçan həm sahibinin ovucunu isitmə, həm də soyutma funksiyalarına malikdir.
Şirkət patentli "TempX" texnologiyasının detalları barədə məlumat verməsə də, məlumdur ki, cihazın korpusu +10,3°C-dən +20°C-yə qədər temperatur dəyişikliklərini təmin edə bilir.
Yeni model "Pixart PAW3950" sensoru əsasında hazırlanıb. Onun sorğu tezliyi 8 000 Hz, əsas düymələrin isə istifadə dözümlülüyü 100 milyon klik olaraq göstərilib.
Siçan üç qoşulma üsulunu dəstəkləyir:
- Bluetooth,
- USB kabel,
- 2.4 GHz radio kanal.
Quraşdırılmış batareya cihazın 100 saata qədər avtonom işləməsinə imkan verir.
"Black Shark Star Flash Cool and Warm Gaming Mouse" 14 oktyabr tarixindən etibarən Çin bazarında 62 ABŞ dolları qiymətinə satışa çıxarılacaq.
