Kaliforniyada süni intellektli çat-botların risklərindən uşaqları qoruyan qanun imzalanıb
15.10.2025 / Maraqlı məlumatlar
Kaliforniya qubernatoru Qevi̇n Nyusom süni intellekt əsasında çalışan çat-botların fəaliyyətini tənzimləyən qanunu imzalayıb. Yeni qanuna əsasən, platformalar istifadəçilərə qarşılarında insan deyil, çat-bot olduğunu açıq şəkildə bildirməlidir. Bu barədə məlumat yetkinlik yaşına çatmayanlara hər üç saatdan bir təqdim edilməlidir.
Qanun, həmçinin şirkətlərə özünə zərər vurmağa yönəlmiş məzmunun qarşısını almaq üçün nəzarət mexanizmləri tətbiq etməyi və istifadəçilərdə intihar meyilləri müşahidə olunduğu hallarda onları böhran xidmətlərinə yönləndirməyi tapşırır.
AZƏRTAC xarici mediaya istinadla xəbər verir ki, Nyosom tərəfindən bazar ertəsi imzalanan bu sənəd texnologiya şirkətlərinə təsir göstərəcək bir neçə qanundan biridir. Digər sənədlər yaşın yoxlanılması, sosial şəbəkələrdə xəbərdarlıq yazılarının yerləşdirilməsi və süni intellekt vasitəsilə razılıq olmadan yayılmış seksual xarakterli məzmunun qarşısının alınması kimi məsələləri əhatə edir.
Qanunun imzalanması Nyusomun uşaqların təhlükəsizliyinin təmin edilməsi ilə Kaliforniyanın süni intellekt sahəsindəki liderliyini tarazlaşdırmaq cəhdini nümayiş etdirir.
“Meta” şirkəti bu qanuna qarşı çıxıb. Kompüter və rabitə sənayesi nümayəndələri isə sənədin innovasiyalara maneə törədə biləcəyini və Kaliforniya şirkətlərini rəqabətdə zəiflədəcəyini bildiriblər.
Kaliforniya süni intellekt sahəsində dünya lideridir, burada dünyanın ən iri 50 süni intellekt şirkətindən 32-si fəaliyyət göstərir.
Son üç il ərzində suallara cavab vermək, mətn, şifr, təsvir və hətta musiqi yaratmaq imkanı verən bu texnologiyanın populyarlığı sürətlə artıb. Onun inkişafı insanların informasiya istehlakı, əmək fəaliyyəti və təhsil üsullarını dəyişməkdədir.
Qanunvericilər hesab edirlər ki, çat-botlar gənclərin psixi sağlamlığına mənfi təsir göstərə bilər, çünki onlar bu texnologiyalardan ünsiyyət və məsləhət almaq üçün geniş şəkildə istifadə edirlər.
