Tesla, SpaceX, X və xAI şirkətlərinin rəhbəri Elon Musk, Microsoft-un birbaşa rəqibi ola biləcək Macrohard layihəsi barədə bəzi təfərrüatları açıqlayıb. Macrohard şirkəti bu ilin avqust ayında Musk tərəfindən qeydiyyatdan keçirilib və bundan bir neçə həftə əvvəl ABŞ Patent Bürosunda eyniadlı ticarət nişanı da rəsmi şəkildə qeydiyyata alınıb. Musk sosial şəbəkə X-də yazıb: “xAI layihəsi Macrohard nəhəng miqyasda böyük təsir göstərəcək” və əlavə edib ki, məqsəd “birbaşa fiziki obyekt istehsal etməyən, lakin bunu dolayı yolla həyata keçirə bilən, Apple üçün məhsul istehsal edən digər şirkətlər kimi fəaliyyət göstərə bilən” bir şirkət qurmaqdır. Yeni şirkətin bu şəkildə təqdim edilməsi onun Microsoft-a tək bir tətbiq və ya xidmət səviyyəsində deyil, platforma miqyasında rəqib olacağını göstərir.

 

Elon Musk-ın təsvirinə görə, xAI şirkəti əməliyyat sistemini, referans layihələri və məhsul tələblərini müəyyən edəcək, cihazların hazırlanması isə Apple-ın biznes modelində olduğu kimi üçüncü tərəflərə - autsorsinq yolu ilə həvalə ediləcək. Bundan başqa, Windows sisteminə bənzər lisenziyalaşdırma variantı da nəzərdən keçirilir. Bu halda OEM tərəfdaşları Macrohard/xAI proqram təminatından istifadə edərək çoxmarkalı cihazlardan ibarət geniş ekosistem yarada biləcəklər. Bu baxımdan süni intellekt agentləri və xidmətləri üçün uyğunlaşdırılmış əsas əməliyyat sisteminin təqdim ediləcəyi gözlənilir.

 

Musk-ın sözlərinə görə, xAI agentləri sənaye səviyyəli proqram təminatının, o cümlədən oyunların hazırlanması və daimi təkmilləşdirilməsi üçün nəzərdə tutulub. Bunun üçün Colossus 1 adlı mövcud və Colossus 2 adlı hazırlanmaqda olan hesablama klasterlərindən istifadə ediləcək. xAI-ın yaxınmüddətli məqsədlərinə 2026-cı ilin sonuna qədər süni intellektlə hazırlanmış “mükəmməl bir oyun”un buraxılması daxildir. Platformanın yaradılması gələcəkdə öz alətləri və tərtibatçı dəstlərinin (developer kits) buraxılmasını da nəzərdə tutur. Elan olunmuş vakansiyalara əsasən, layihədə xarici mütəxəssislərdən ibarət kiçik bir komanda da iştirak edir, lakin əsas yük xAI şirkətinin əməkdaşlarının və infrastrukturunun üzərinə düşür.