Yeni tədqiqat: Beyinlər fərqli olsa da, dünyanı oxşar görürük
17.10.2025 / Xəbərlər
Reyxman Universiteti və Veizmann Elm İnstitutunun alimləri insanların dünyanı niyə və necə oxşar şəkildə qavradığını araşdırıblar.
AZƏRTAC “MedicalXpress” portalına istinadla xəbər verir ki, tədqiqata görə, hər bir insan beynində neyronlar, yəni sinir hüceyrələri fərqli şəkildə işləsə də, onların fəaliyyətləri arasında oxşar əlaqə quruluşu mövcuddur. Yəni iki fərqli insan bir itə baxanda beyinlərində aktivləşən konkret neyronlar fərqli olsa da, bu neyronların ümumi əlaqə nümunəsi bənzər qalır.
Alimlər epilepsiya xəstələrinin beyninə tibbi məqsədlə yerləşdirilmiş elektrodların verdiyi məlumatlardan istifadə ediblər. Bu elektrodlar sayəsində insanların müxtəlif şəkillərə baxarkən beyinlərində hansı neyronların aktivləşdiyini real vaxtda müşahidə etmək mümkün olub. Tədqiqatçılar müəyyən ediblər ki, fərqli beyinlər eyni obyektə baxarkən müxtəlif neyronları işə salsalar da, bu neyronlar arasındakı əlaqə sistemi oxşar qalır. Bu isə insanların dünyanı ümumilikdə eyni şəkildə qavramasına səbəb olur.
Alimlər hesab edirlər ki, bu tapıntı beynin “təmsil kodunu”, yəni məlumatı necə təşkil etdiyini anlamağa kömək edəcək. Bu bilik həm nevrologiyanın inkişafına, həm də süni intellekt sistemlərinin daha ağıllı şəkildə dizayn edilməsinə təkan verə bilər.
TədqiqatIN nəticələri “Nature Communications” jurnalında dərc olunub.
