Xərçəng terapiyasının effektivliyini artıran təbii vasitə müəyyənləşib
21.10.2025 / Maraqlı məlumatlar
Yohannesburq Universitetinin alimləri müəyyən ediblər ki, nar ekstraktı döş xərçənginin müalicəsində tətbiq olunan fotodinamik terapiyanın təsirini əhəmiyyətli dərəcədə gücləndirə bilər.
AZƏRTAC xəbər verir ki, tədqiqatın nəticələri “Advances in Traditional Medicine (ATM)” jurnalında dərc olunub.
Laboratoriya təcrübələri göstərib ki, bitki ekstraktının xlorofil törəməsi “feoforbid-a” ilə birləşdirilməsi şiş hüceyrələrinin (MCF-7) böyüməsini tək ekstraktla müqayisədə demək olar ki, iki dəfə daha səmərəli şəkildə dayandırır.
Tədqiqatçılar qeyd edirlər ki, belə kombinə edilmiş yanaşma apoptozun, yəni, hüceyrə ölümünün həm xarici, həm də daxili mexanizmlərini aktivləşdirir ki, bu da onu sağlam toxumalar üçün daha dəqiq və təhlükəsiz edir. Şişin qarşısını almaq üçün tələb olunan konsentrasiya 289 mkq/ml-dən 129 mkq/ml-dək azalıb ki, bu da güclü sinergetik təsir göstərir.
Müəlliflərin sözlərinə görə, taninlər, antosianidinlər və fenollarla zəngin olan nar ekstraktı xüsusilə müasir fototerapevtik texnologiyalarla birlikdə xərçəng əleyhinə yumşaq və effektiv müalicə üsullarının əsasını təşkil edə bilər. Alimlər indi hüceyrə səviyyəsində aparılan təcrübələrdən heyvan sınaqlarına keçməyi planlaşdırırlar ki, meyvənin onkoloji xəstəliklərin müalicəsində təbii yardımçı vasitə kimi potensialını təsdiqləsinlər.
