Londonda yeni göz implantı: görmə qabiliyyətini itirmiş pasiyentlər yenidən oxumağı bacarıblar
21.10.2025 / Maraqlı məlumatlar
Londondakı Moorfields Göz Xəstəxanasında həyata keçirilən beynəlxalq tibbi sınaq çərçivəsində görmə qabiliyyətini itirmiş bir qrup pasiyentə göz dibinə implant yerləşdirildikdən sonra onlar yenidən oxumağı və yazmağı bacarıblar.
AZƏRTAC BBC-yə istinadla xəbər verir ki, cərrahların beş pasiyent üzərində tətbiq etdiyi bu mikroçip implantasiyası əməliyyatının nəticələri “heyrətamiz” adlandırılıb. Əməliyyatı həyata keçirən həkim bildirib ki, bu texnologiya göz xəstəliklərinin müalicəsində inqilabi dönüş nöqtəsi ola bilər.
Yeni texnologiya quru yaşa bağlı makulyar degenerasiya (AMD) xəstəliyinin inkişaf etmiş forması -coğrafi atrofiyadan əziyyət çəkən pasiyentlər üçün ümid yaradır. Hazırda bu xəstəlik Böyük Britaniyada 250 min, dünyada isə 5 milyondan çox insanı təsirləndirir.
Xəstəliyin gedişatında torlu qişanın mərkəzindəki hüceyrələr tədricən məhv olur, bu isə bulanıq və ya təhrif olunmuş mərkəzi görməyə, rəng və detalları seçmək qabiliyyətinin itirilməsinə səbəb olur.
Əməliyyat zamanı həkimlər torlu qişanın altına 2 mm ölçüdə, insan tükü qalınlığında fotovoltaik mikroçip yerləşdiriblər. Daha sonra pasiyentlər videokamera ilə təchiz edilmiş xüsusi eynəklər taxıblar. Kamera görüntüləri infraqırmızı şüa vasitəsilə implanta ötürülür, oradan cib prosessorunda aydınlaşdırılır və görmə siniri vasitəsilə beyinə ötürülür. Nəticədə pasiyentlərə qismən görmə qabiliyyəti bərpa olunur.
Pasiyentlər əməliyyatdan sonra bir neçə ay ərzində beyinin yeni görüntüləri tanıma və şərh etmə üsuluna uyğunlaşması üçün təlim keçiblər. Həkimlər hesab edirlər ki, bu texnologiya gələcəkdə tam korluq hallarında belə qismən görməni bərpa etmək üçün yeni imkanlar açacaq.
