“Bəziləriniz bəlkə də fərqinə vardınız: mən mövcud deyiləm, bu hadisələri yerində işıqlandırmamışam. Mənim obrazım və səsim süni intellekt tərəfindən yaradılıb” - deyə süni intellekt aparıcısı bildirib və əlavə edib ki, yaxın illərdə süni intellekt hər bir insanın həyatına təsir göstərəcək. Bəlkə də o, bəzi insanların - o cümlədən çağrı mərkəzi operatorlarının, müştəri dəstək xidməti əməkdaşlarının və hətta televiziya aparıcılarının da - işini əllərindən alacaq. Süni intellektlə yaradılmış aparıcı Kalel Productions üçün reklamlar hazırlayan və neyroşəbəkələrdən istifadə edən Seraphinne Vallora adlı marketinq şirkəti tərəfindən hazırlanıb. Təlimatlar və istiqamətləndirmələr vasitəsilə kamera qarşısında incə emosional çalarları ifadə edə bilən realistik rəqəmsal insan obrazı yaradılıb. Channel4.com-un məlumatına görə, bu süni intellekt obrazı insandan demək olar ki, fərqlənmir.

Layihə insanın ekrandakı varlığını inandırıcı şəkildə imitasiya etməyə imkan verən süni intellekt alətlərinin nə dərəcədə əlçatan hala gəldiyini nümayiş etdirir. “Channel 4 üçün süni intellekt aparıcısından istifadə ənənəyə çevrilməyəcək. Biz xəbərlər və aktual hadisələrdə diqqətimizi yüksək keyfiyyətli, yoxlanılmış, qərəzsiz və etibarlı jurnalistikaya yönəldirik - bu, süni intellektin bacarmadığı bir şeydir. Bununla belə, bu təcrübə süni intellektin nə qədər dağıdıcı potensiala malik olduğunu və auditoriyanın yoxlaya bilmədiyi məzmunla necə asanlıqla aldadıla biləcəyini xatırladan faydalı bir nümunədir” - deyə Channel 4-ün xəbər və aktual hadisələr şöbəsinin rəhbəri Louisa Compton bildirib. Dispatches həmçinin qeyd edib ki, Böyük Britaniyada rəhbərlərin demək olar 2/3-si artıq əvvəllər insanlar tərəfindən yerinə yetirilmiş tapşırıqlar üçün süni intellektdən istifadə edir.