“Azərbaycan müəllimi” xəbər verir ki, bu fikirləri bu gün elm və təhsil naziri Emin Əmrullayev “Gənc qızların təhsilinə dəstək” layihəsi çərçivəsində həyata keçirilən “Hənifə Məlikova-Zərdabi adına təqaüd proqramı 2025”in təqdimat mərasimində səsləndirib.

Nazir qeyd edib ki, qadınların inkişafı ilə təhsilin inkişafı arasında sıx əlaqə var:

“Bu baxımdan mən də öz növbəmdə komandaya təşəkkürümü bildirirəm, çünki vaxtında bu təşəbbüsü irəli sürdünüz, biz də maraqlı tərəf kimi bu təşəbbüsə qoşulmaqdan məmnunuq. Hesab edirəm ki, həm ictimai maraqlar, həm də ümumi dövlət və cəmiyyət maraqları baxımından bu təşəbbüsün dəstəklənməsi olduqca önəmlidir”.

Emin Əmrullayevin sözlərinə görə, uzunmüddətli perspektivdə layihədən bütün tərəflər — tələbələr, dövlət qurumları, özəl sektor və bütövlükdə Azərbaycan ictimaiyyəti fayda qazanacaq. Bu təşəbbüsün beşinci ilində yüzlərlə gənc azərbaycanlı qızın təhsilinə dəstək göstərilməsi qadın təhsilinin nə qədər vacib bir faktor olduğunu bir daha sübut edir.

Nazir əlavə edib ki, qadınların təhsili və onların cəmiyyətdəki rolu baxımından qarşıda qət edilməli uzun bir yol var:

“Təhsil prizmasından baxdıqda görürük ki, qadının cəmiyyətdəki mövqeyi, ictimai və sosial gücü istənilən təhsil sisteminin keyfiyyətini və funksionallığını müəyyən edən əsas amillərdəndir, çünki əhalinin təxminən yarısı qadınlardan ibarətdir. Əhalinin yarısını diqqətdən kənarda saxlamaq, onlara daha az hüquq və azadlıq vermək təhsildə də eyni məhdudiyyətlərin yaranmasına səbəb olur”.

Emin Əmrullayev bildirib ki, bu cür layihələr qadınların təhsil imkanlarını genişləndirməklə yanaşı, ölkənin sosial və iqtisadi inkişafına da mühüm töhfə verir.