AMEA-nın İdarəetmə Sistemləri İnstitutunda “Kompüter elmləri” ixtisası üzrə magistrlik dissertasiyalarının onlayn müdafiəsi keçirilmişdir
25.06.2020 / Xəbərlər25 iyun 2020-ci il tarixində AMEA-nın İdarəetmə Sistemləri İnstitutunda II kurs magistrantların 060509 – “Kompüter elmləri” ixtisası üzrə magistrlik dissertasiyalarının müdafiəsi üzrə ixtisaslaşdırılmış şuranın “Skype” proqramı vasitəsilə onlayn iclası keçirilmişdir. İclasda şura üzvləri ilə yanaşı, AMEA-nın akademik-katibi, AMEA-nın müxbir üzvü Əminağa Sadıqov, AMEA Rəyasət Heyəti aparatının Elm və təhsil idarəsinin rəisi, iqtisad elmləri üzrə fəlsəfə doktoru Fail Kazımov, idarənin Magistratura şöbəsinin müdiri, aqrar elmlər üzrə fəlsəfə doktoru Fikrət Feyziyev, İnformasiya Texnologiyaları İnstitutunun Təhsil şöbəsinin rəhbəri, texnika üzrə fəlsəfə doktoru Fərhad Yusifov da iştirak ediblər.
Onlayn keçirilən iclasda İdarəetmə Sistemləri İnstitutunun 2, İnformasiya Texnologiyaları İnstitutunun 3 magistrantı dissertasiya işlərini müdafiəyə təqdim etdilər.
“Paylanmış sistemlər və şəbəkələr” ixtisaslaşması üzrə magistrant Aytən Adil qızı Əhmədova AMEA-nın müxbir üzvü Məsumə Məmmədovanın rəhbərliyi ilə “Elektron səhiyyə şəbəkəsinin arxitektur prinsiplərinin işlənməsi”, “İntellektual sistemlər” ixtisaslaşması üzrə magistrant Samir Tələt oğlu Məmmədov AMEA-nın müxbir üzvü Kamil Ayda-zadənin rəhbərliyi ilə “Azərbaycan dilində verilən mətnləri anlamağa əsaslanan “kompüter-insan” dialoq sisteminin alqoritm və proqramlarının hazırlanması”, “Kompüterli modelləşdirmə” ixtisaslaşması üzrə magistrant Ülviyyə Malik qızı Kadaşeva riyaziyyat üzrə fəlsəfə doktoru, dosent Ədalət Paşayevin rəhbərliyi ilə “Mancanaq dəzgahının kinematikasının riyazi modeli əsasında vatmetroqramların dinamoqramlara çevrilməsini təmin edən alqoritmlərin, proqram vasitələrinin işlənilməsi və kompüter eksperimentlərinin aparılması”, “Kompüter sistemlərinin və şəbəkələrinin proqram təminatı” ixtisaslaşması üzrə magistrantlar – Aygül Fəxrəddin qızı AMEA-nın müxbir üzvü Ramiz Alıquliyevin rəhbərliyi ilə “Pythonda böyük ölçülü verilənlərin analizi üçün DBSCAN alqoritminin tətbiqi” və Arzu Şamil qızı Həsənli texnika üzrə fəlsəfə doktoru, dosent Rəşid Ələkbərovun rəhbərliyi ilə “Verilənlərin emal mərkəzində bulud texnologiyaları əsasında virtual resursların səmərəli istifadəsi metodları” mövzusunda yerinə yetirdikləri magistrlik dissertasiya işlərini təqdimatlar vasitəsilə iclas iştirakçılarının diqqətinə çatdırdılar.
Magistrantların təqdimatlarından sonra iclas iştirakçıları tərəfindən hər bir iş üzrə iddiaçılara suallar verildi və geniş müzakirələr aparılaraq iddiaçıların dissertasiya işlərinin aktuallığı, tələbələrin təqdimat və tədqiqatçılıq bacarıqları təhlil olundu.
Müzakirələrdə AMEA-nın akademik-katibi, AMEA-nın müxbir üzvü Əminağa Sadıqov çıxış edərək AMEA-nın magistraturasında tələbələrin inkişafı üçün yaradılmış elmi-tədris bazasının əhəmiyyətini xüsusi vurğulayaraq dissertasiya işlərinin yüksək keyfiyyətlə hazırlanmasında maddi-texniki bazadan məharətlə istifadə edildiyini diqqətə çatdırdı. Çıxışının sonunda Ə. Sadıqov magistrantlara uğurlar arzulayaraq təhsillərini davam etdirmələri üçün öz tövsiyə və təkliflərini verdi.
Magistrantların təqdimatları ətrafında müzakirələr aparıldıqdan sonra açıq səsvermə keçirilərək müəyyən olunmuş meyarlara əsasən müdafiə olunan dissertasiya işləri qiymətləndirildi. Magistrlik dissertasiyalarının müdafiəsi üzrə ixtisaslaşdırılmış şura qiymətləndirmənin nəticələri əsasında magistrantların hər birinə magistr elmi-ixtisas dərəcəsinin verilməsi haqqında qərar qəbul etdi.