SABAH qruplarında təhsil alan tələbələr İSİ-də təcrübə keçəcəklər
01.12.2016 / Xəbərlər
1 dekabr 2016-cı il tarixində İdarəetmə Sistemləri İnstitutunda 01.12.2016-31.05.2017-ci il tarixləri arasında təcrübə keçəcək "SABAH” qruplarında təhsil alan tələbələrlə görüş keçirilmişdir. Görüşü institutun direktoru, akademik Telman Əliyev açaraq, tələbələrə Azərbaycanda İKT elminin keçdiyi inkişaf yolundan bəhs etdi və onlara uğurlar arzuladı. Sonra tələbələr təcrübə keçəcəkləri laboratoriyalar və rəhbərlər ilə tanış oldular.
Qeyd etmək lazımdır ki, İdarəetmə Sistemləri İnstitutunda aşağıda qeyd olunan 3 Universitetdən 4 ixtisas üzrə 20 tələbə təcrübə keçəcək:
Bakı Dövlət Universiteti - "Kompüter elmləri”
Azərbaycan Dövlət Neft və Sənaye Universiteti - "İstehsalat proseslərinin avtomatlaşdırılması”
Azərbaycan Texniki Universiteti - "İT və sistemləri mühəndisliyi”, "Kompüter mühəndisliyi”
Tələbələr İnstitutun 1.5 saylı "Texniki obyektlərin monitorinqi və nəzarət sistemləri”; 1.9 saylı "Neftqazçıxarma obyektlərinnin nəzarət, diaqnostika və idarəetmə sistemləri” 3.1 saylı "Determinik sistemlərdə qərar qəbuletmənin ədədi üsullаrı” və 3.5 saylı "Kənd təsərrüfatında modelləşdirmə və idarəetmə” laboratoriyalarında təcrübə keçəcəklər. Təcrübələrə riyaziyyat elmləri doktoru, professor, AMEA-nın müxbir üzvü Ayda-zadə Kamil Rəcəb oğlu, texnika elmləri doktoru Quluyev Qəmbər Ağaverdi oğlu, texnika üzrə fəlsəfə doktoru, dosent Rzayev Asif Hacı oğlu və riyaziyyat üzrə fəlsəfə doktoru Paşayev Ədalət Bəxtiyar oğlu rəhbərlik edəcəklər.
