Wikipedia süni intellektlə yazılmış mətnləri necə tanıdığını açıqlayıb

24.11.2025 / Maraqlı məlumatlar

Technote.az “TechCrunch” platformasına istinadən bildirir ki, Wikipedia süni intellekt mətnlərini tanımaq üçün ən dəqiq bələdçisini açıqlayıb. Son illər oxuduğumuz mətnlərin süni intellekt tərəfindən yazılıb-yazılmadığını müəyyənləşdirmək getdikcə çətinləşir. Bəzən müəyyən sözlərin məsələn, “delve” və ya “underscore” kimi ifadələrin modeli ələ verdiyi düşünülürdü, amma sübutlar zəif idi və modellər inkişaf etdikcə bu işarələr daha da gizlənməyə başladı.
Lakin görünür ki, Wikipedia redaktorları bu problemi nəzərəçarpacaq dərəcədə dəqiqliklə həll etməyi bacarıb. Platformanın könüllüləri “AI Cleanup Project” çərçivəsində 2023-cü ildən bəri süni intellektlə yazılmış mətnləri təmizləməklə məşğuldur. Gündə milyonlarla redaktə daxil olduğu üçün böyük həcmli məlumat bazasına malikdirlər və nəticədə “AI yazı işarələri” adlanan çox detallı və sübutlu bir bələdçi hazırlayıblar.

Bələdçidə öncə bildirilir ki, avtomatik AI-detect alətləri demək olar ki, yararsızdır. Əvəzində, redaktorlar modellərin tipik yazı vərdişlərini izləyir. Məsələn, süni intellekt mətnləri mövzunun nə qədər “önəmli” olduğunu vurğulamağa həddindən artıq meyillidir. Tez-tez “həlledici an”, “geniş hərəkatın bir hissəsi” kimi ümumi ifadələrdən istifadə edir. Bu tip ton şəxsi bloqlara və internet məzmunlarına uyğundur, lakin ensiklopedik mətn üçün qeyri-peşəkar görünür.
Wikipedia həmçinin modellərin kiçik media qeydini belə mövzunu daha əhəmiyyətli göstərmək üçün şişirtmək vərdişinə diqqət çəkir. Bu, şəxsi bio formatındaki yazılara xasdır, amma müstəqil mənbə tərzinə uyğun deyil.
Bələdçinin ən maraqlı müşahidələrindən biri isə budur: AI tez-tez cümlələrin sonuna “təqdir edən”, “vurğulayan”, “əks etdirən” kimi -ing formalarına bənzər iştirakçı feli ifadələr əlavə edir. Bu, mətnə bulanıq, qeyri-müəyyən bir ton verir və bir müddət sonra demək olar ki, hər yerdə gözə dəyir.
Redaktorlar həmçinin süni intellektin reklam tərzində ümumi təsvirlərə “mənzərəli”, “nəfəskəsici”, “müasir və təmiz” kimi ifadələrə həddindən artıq meyilli olduğunu bildirir. Onların sözləri ilə desək, belə yazılar “sanki TV reklamının transkriptinə oxşayır”.
Wikipedia bələdçisi süni intellekt mətnlərinin sürətlə dəyişdiyi düşüncəsinə baxmayaraq, AI yazısının köhnəlməyən, dərin şəkildə oturuşmuş xüsusiyyətləri olduğunu göstərir. Bu xüsusiyyətləri gizlətmək mümkündür, lakin tam aradan qaldırmaq çətin olacaq.

technote.az