Meta rəqib AI çatbotlarını qadağan edir
28.11.2025 / Maraqlı məlumatlar
Technote.az "The Verge" platformasına istinadən bildirir ki, Meta WhatsApp-ın yeni istifadə şərtlərini yeniləyərək rəqib süni intellekt çatbotlarının platformada yayılmasını qadağan edir. Bu dəyişikliyə görə ChatGPT və Copilot 15 yanvar 2026-dan etibarən WhatsApp-dan tamamilə çıxarılacaq.
OpenAI bir neçə həftə əvvəl WhatsApp-dan ayrılacağını açıqlamışdı, Microsoft isə bu həftə oxşar qərar verdiyini bildirdi. Hər iki şirkət WhatsApp Business Solution üçün yenilənmiş qaydaları səbəb göstərir. ChatGPT istifadəçiləri söhbət tarixçələrini itirməmək üçün hesablarını WhatsApp-a bağlaya biləcək, lakin Copilot istifadəçilərinə belə imkan verilməyəcək.
Meta oktyabr ayında elan etdiyi yeni qaydalarla AI şirkətlərinin WhatsApp Business API-ni öz AI məhsullarını yaymaq üçün istifadə etməsini qadağan edir. Yalnız müştəri xidməti və dəstək məqsədli botlara icazə veriləcək. Məqsəd Meta rəqiblərinin WhatsApp vasitəsilə istifadəçilərə çıxışını məhdudlaşdırmaqdır. Yeni qaydaların qüvvəyə minməsi ilə Perplexity kimi digər AI çatbotlarının da platformanı tərk etməsi gözlənilir. Nəticədə, 2026-cı ildən WhatsApp-da yalnız Meta AI istifadə oluna biləcək.
