Chrome istifadəçilərinə 1 illik pulsuz Photoshop Web imkanı təqdim olunur
01.12.2025 / Maraqlı məlumatlar
Technote.az "NewsBytes" platformasına istinadən bildirir ki, Google Chrome Photoshop-un yeni brauzer genişlənməsini quraşdıran istifadəçilərə bir illik pulsuz Photoshop Web abonementi təklif edir. Adobe-nin açıqlamasına görə, bu funksiya kontent yaradıcıları, dizaynerlər, marketoloqlar və gündəlik sürətli şəkil redaktəsinə ehtiyacı olan hər kəs üçün nəzərdə tutulub. Kampaniya 8 dekabr 2025-ə qədər keçərlidir.
İstifadəçilər əvvəlcə Google Chrome brauzerini açaraq Photoshop-u Chrome Web Store-dan yükləməlidirlər. Bunun üçün birbaşa uzantı səhifəsinə keçmək və ya mağazada “Photoshop” axtarmaq kifayətdir. Daha sonra “Add to Chrome” düyməsinə kliklənir və genişlənmə brauzerə əlavə olunur. Genişlənmə quraşdırıldıqdan sonra istifadəçi Adobe hesabına giriş etməlidir. Hesaba daxil olduqdan sonra Photoshop Web üçün 1 illik pulsuz abonement avtomatik olaraq aktivləşir. Proses sürətli və sadədir, yükləmədən dərhal sonra Photoshop Web-dən istifadə etməyə başlamaq mümkündür.
Yeni Photoshop genişlənməsi sayəsində istifadəçilər şəkillərin fonunu silə, rəngləri tənzimləyə və digər sadə dəyişiklikləri birbaşa Chrome üzərindən həyata keçirə bilir. Artıq internetdən şəkil endirib yenidən Photoshop-a yükləməyə ehtiyac qalmır. Şəkillər üzərində sağ klik edərək və ya uzantının menyusundakı Photoshop ikonuna toxunaraq redaktəyə başlamaq mümkündür. Daha geniş imkanlara gəlincə, istifadəçilər parlaqlıq, kontrast, saturasiya kimi parametrləri detallı şəkildə idarə edə, sosial şəbəkələr üçün hazır kəsim ölçülərindən istifadə edə və son nəticəni birbaşa cihazlarına ixrac edə bilirlər.
