“Amazon” və “Google” daha sürətli bağlantı üçün çoxbuludlu xidmət təqdim edir

02.12.2025 / Maraqlı məlumatlar

“Amazon” və “Google” şirkətləri etibarlı bağlantıya artan tələbatı ödəmək üçün birgə hazırlanmış çoxbuludlu şəbəkə xidmətini təqdim edib.

AZƏRTAC “Reuters” agentliyinə istinadla xəbər verir ki, bu barədə şirkətlərin açıqlamasında deyilir.

Bu təşəbbüs müştərilərə iki şirkətin hesablama platformaları arasında həftələr deyil, dəqiqələr ərzində özəl, yüksəksürətli bağlantılar qurmağa imkan verəcək.

Yeni xidmət, oktyabrın 20-də “Amazon Web Services”in işində nasazlıq yarandıqdan və bu nasazlıq Snapchat və Reddit də daxil olmaqla ən populyar internet tətbiqlərindən bəzilərini sıradan çıxararaq, bütün dünyada minlərlə veb-saytın işini pozduqdan təqribən bir ay sonra təqdim edilib. “Parametrix” analitik şirkətinin məlumatına görə, nasazlıq Amerika şirkətlərinə 500-650 milyon dollara başa gələcək.

İki bulud xidməti provayderinin bildirdiyinə görə, yeni təklif şəbəkənin qarşılıqlı fəaliyyətini yaxşılaşdırmaq üçün AWS-in çoxbuludlu İnterconnect həllini “Google Cloud”un çarpaz bulud həlli ilə birləşdirir.

“AWS və “Google Cloud” arasındakı bu əməkdaşlıq çoxbuludlu bağlantıda fundamental bir dəyişiklikdir”, - deyə AWS-in şəbəkə xidmətləri üzrə vitse-prezidenti Robert Kennedi bildirib.

“Google Cloud”un bulud şəbəkəsi üzrə vitse-prezidenti və baş meneceri Rob Enns qeyd edib ki, birgə şəbəkə müştərilər üçün buludlar arasında məlumatların və tətbiqlərin hərəkətini asanlaşdırmaq üçün nəzərdə tutulub.

“Google Cloud”un açıqlamasına görə, “Salesforce” yeni səhifə açır, yeni yanaşmanın ilk istifadəçilərindən biridir.

AWS bizneslərə, dövlət qurumlarına və fərdlərə hesablama vahidləri, məlumatların saxlanması üçün yerlər və digər rəqəmsal xidmətlər təqdim edir və dünyanın ən böyük bulud xidmətləri təminatçısıdır. Ondan sonra “Microsoft”, “Azure” və “Google Cloud” yer alıb.

“Alphabet”, “Microsoft” və “Amazon” da daxil olmaqla texnoloji şirkətlər, internet trafik və süni intellektin artan tələblərini idarə edə bilən infrastruktur qurmaq üçün milyardlarla dollar sərmayə qoyurlar. Çünki bu xidmətləri dəstəkləmək üçün hesablama vahidlərinə tələbat artır.

“Amazon” bulud biznesi üçüncü rübdə güclü artım nümayiş etdirərək, 33 milyard dollar gəlir əldə edib, bu isə “Google”ın 15,16 milyard dollarlıq gəlirindən iki dəfə çoxdur.

azertag.az