Technote.az "The Verge" platformasına istinadən bildirir ki, YouTube istifadəçilərin bir il ərzində formalaşdırdıqları baxış vərdişlərini daha yaxşı anlamaq üçün yeni “Recap” adlı illik icmal xüsusiyyətini təqdim edib. Bu funksiya sayəsində platforma sizin izləmə tarixçənizə əsaslanaraq ən çox baxdığınız kanalları, maraq sahələrinizi, il ərzindəki dəyişən zövqlərinizi və video istehlak davranışınızı vizual kartlar şəklində təqdim edir.

YouTube-un açıqlamasına görə Recap istifadəçilərə 12-yə qədər info-kart göstərərək onların hansı kontentlərə daha çox maraq göstərdiyini xüsusi şəkildə vurğulayır. Buraya favorit kanallarınız, il ərzində dərinləşdiyiniz mövzular və baxış tarixçənizin zamanla necə dəyişdiyi də daxildir. Yeni xüsusiyyət Spotify Wrapped kimi məşhur illik xülasələrə bənzəyir. Hətta YouTube istifadəçilərə baxış vərdişlərinə əsasən “Adventurer”, “Skill Builder” və “Creative Spirit” kimi xüsusi fərdi “şəxsiyyət tipi” də təyin edir.