Marsda saat Yerdən sürətli işləyir

04.12.2025 / Maraqlı məlumatlar

ABŞ-nin Milli Standartlar və Texnologiyalar İnstitutunun fizikləri ilk dəfə olaraq Marsda saatların Yerlə müqayisədə nə qədər sürətlə işlədiyini hesablayıblar.

“Qafqazinfo” xəbər verir ki, “The Astronomical Journal”da dərc olunan araşdırmaya görə, Mars sutkası Yer vaxtından təxminən 477 mikrosaniyə irəlidədir.

Qeyd olunub ki, bu, orta göstəricidir, lakin planetin orbiti və səma cisimlərinin təsiri səbəbindən Mars ili ərzində bu fərq ±226 mikrosaniyə dəyişə bilər. Belə ki, Eynşteynin nisbilik nəzəriyyəsinə əsasən, zamanın axışı qravitasiya və obyektin sürətindən asılıdır. Qırmızı planetdə cazibə qüvvəsi Yerdəkindən demək olar ki, üç dəfə az olduğundan, orada yerli vaxt “sürətlənir”.

Alimlər qeyd edirlər ki, saatların sabit olaraq 56 mikrosaniyə sürətli işlədiyi Aydan fərqli olaraq, Marsda gündəlik əhəmiyyətli tərəddüdlər müşahidə olunur. Yarım millisaniyədən az olan bu fərq cüzi görünsə də, rabitə və naviqasiya üçün olduqca kritikdir. Müasir 5G şəbəkələri 0,1 mikrosaniyə dəqiqlik tələb edir, planetlərarası əlaqə üçün isə daha ciddi standartlar lazımdır.

Mütəxəssislər əmindirlər ki, bu hesablamalar gələcəkdə təkcə Yer üçün deyil, Ay, Mars və digər planetlər üçün vahid standart rolunu oynayacaq “Günəş” zaman sisteminin əsasını təşkil edəcək.

qafqazinfo.az