Meta AI-ı daha dəqiq etmək üçün media şirkətləri ilə razılaşıb
09.12.2025 / Maraqlı məlumatlar
Technote.az “Engadget” platformasına istinadən bildirir ki, Meta süni intellekt çatbotlarının xəbərlər ilə bağlı suallara daha dəqiq cavab verməsi üçün bir neçə aparıcı media orqanı ilə yeni əməkdaşlıqlar qurub. Axios-un məlumatına görə, şirkət USA Today, People, Le Monde, CNN kimi tanınmış nəşrlərlə yanaşı, Fox News, The Daily Caller və Washington Examiner kimi daha çox mühafizəkar media qurumları ilə də çoxillik kommersiya müqavilələri bağlayıb.
Bu razılaşmalar Meta-ya həmin nəşrlərin məzmunundan istifadə etməyə və real vaxt məlumatlarına çıxış əldə etməyə imkan verəcək. Eyni zamanda, şirkətin AI çatbotları xəbər suallarını cavablandırarkən mənbə kimi birbaşa həmin məqalələrə link verəcək. Bu da nəşrlərə müəyyən dərəcədə əlavə oxucu trafiki gətirə bilər.
Müqavilələrin maliyyə detalları açıqlanmasa da, Meta-nın bu addımı diqqət çəkir. Çünki şirkət uzun illərdir xəbərlərin istifadəsi üçün media təşkilatlarına ödəniş etməyə maraqlı deyildi. Meta 2022-ci ildə ABŞ-də xəbər nəşrlərinə ödəniş proqramını dayandırmış, ötən il isə Facebook-un “News” bölməsini tamamilə ləğv etmişdi.
Şirkət bildirir ki, bu yalnız ilk addımdır və gələcəkdə daha çox media tərəfdaşı əlavə ediləcək.
