Yeniləmədən sonra Pixel Watch 4 Apple Watch-da olduğu kimi “iki barmaqla sıxma” (double pinch) jestini dəstəkləyəcək. İstifadəçilər baş və şəhadət barmaqlarını birləşdirərək zənglərə cavab verə, zəngi bitirə, taymerləri dayandıra və digər əsas funksiyaları idarə edə biləcəklər. Sistem uyğun hallarda bu jestdən istifadə edilə biləcəyini ekranda da göstərəcək. Əvvəllər Google-un ağıllı saatlarında biləyi tez çevirməklə siyahılar arasında gəzmək mümkün idi. Yeni sistemdə isə bu hərəkət ekrandakı məzmunu bağlamaq üçün istifadə olunacaq. Məsələn, bildirişi silmək və ya gələn zəngi rədd etmək bu jestlə mümkün olacaq.

Maraqlısı odur ki, Pixel Watch 3 bu jest dəstəyini almayacaq. Halbuki texniki baxımdan Pixel Watch 3 demək olar ki, eyni prosessora və sensorlara malikdir. Pixel Watch 4-ün əsas fərqi onun daha təkmilləşdirilmiş, təmirə uyğun korpus dizaynıdır. Google bu məhdudiyyətin səbəbini açıqlamayıb və bu addımın yeni modeli daha cəlbedici göstərmək üçün atıldığı ehtimal olunur.