"Meta" istifadəçilərin yaşını yoxlamaq üçün yeni sistem tətbiq edəcək
18.12.2025 / Maraqlı məlumatlar
ABŞ-nin "Meta" şirkəti 2026-cı ilə qədər bir çox ölkədə istifadəçilərin yaşını yoxlamaq üçün "AgeKey" sistemini tətbiq etməyi planlaşdırır.
Oxu.Az xəbər verir ki, bunu "Financial Times" nəşrinə açıqlamasında şirkətin təhlükəsizlik rəhbəri Antigone Davis bildirib.
"Müxtəlif ölkələrdə bizim kimi şirkətlərin istifadə etməli olduğu yaşı müəyyən edən sistemlər mövcuddur. Hazırda bu bazarda müxtəlif variantlardan istifadə olunur, ona görə də biz kompleks yanaşmadan istifadə etməyə çalışırıq", - o deyib.
Onun sözlərinə görə, "AgeKey" smartfonlarda barmaq izlərini tanımaq və ya cihazların kilidini açmaq üçün üz tanıma üçün istifadə olunan "Passkey"lə eyni texnologiyadan bəhrələnəcək.
"Meta"nın hazırda "AgeKey"i tətbiqlərinə inteqrasiya etmək üçün Sinqapurun "K-ID" şirkəti ilə əməkdaşlıq etdiyi bildirilir. Həmin şirkət hazırda "Discord" və "Snap" kimi xidmətlərlə işləyir və onlara istifadəçi yaşına əsasən kontent çatdırılmasını fərdiləşdirməyə kömək edir.
Qeyd edək ki, bir çox ölkələr yetkinlik yaşına çatmayanların sosial mediadan istifadəsinə məhdudiyyətlər və qadağalar tətbiq etməyə başlayıblar. Dekabrın 9-da Avstraliyada 16 yaşdan kiçik şəxslərin sosial mediaya çıxışını qadağan edən qanun qüvvəyə minib. Danimarka 2026-cı ilə qədər yaşı 15-dən aşağı olan yeniyetmələrin sosial mediaya çıxışını məhdudlaşdırmağı planlaşdırır. Bundan əlavə, Fransa prezidenti Emmanuel Makron 15 və ya 16 yaşdan kiçik adamların sosial mediaya çıxışını qadağan edən qanunun qəbulunu tələb etmək niyyətindədir.
