Amazon yeni xidmət inteqrasiyalarını elan etdi

26.12.2025 / Maraqlı məlumatlar

Technote.az “TechCrunch” platformasına istinadən bildirir ki, Amazon süni intellektlə gücləndirilmiş rəqəmsal köməkçisi Alexa+ üçün yeni imkanlar təqdim edir. Şirkət açıqlayıb ki, 2026-cı ildən etibarən Alexa+ artıq Angi, Expedia, Square və Yelp platformaları ilə inteqrasiya olunacaq.

Bu yenilik istifadəçilərə hotelləri bron etmək, ev xidmətləri üçün qiymət təklifləri almaq, eləcə də salon və digər şəxsi xidmətlər üçün görüşlər planlaşdırmaq imkanı verəcək. Məsələn, Expedia inteqrasiyası sayəsində istifadəçilər otelləri müqayisə edə, rezervasiya edə və öz seçimlərinə uyğun tövsiyələr ala biləcəklər. İstifadəçi sadəcə olaraq Alexa’ya “Bu həftəsonu Çikaqoda ev heyvanları üçün uyğun otellər tapa bilərsənmi?” deməklə axtarışı başlada biləcək.

Yeni əlavələr Alexa+ platformasının mövcud inteqrasiyalarına da qoşulur. Amazon-un məqsədi istifadəçilərin müxtəlif onlayn xidmətlərdən birbaşa süni intellekt köməkçisi vasitəsilə daha rahat istifadə etməsini təmin etməkdir. Bu yanaşma ChatGPT-nin tətbiqlərlə inteqrasiya modelinə bənzər şəkildə qurulub.