Riyaziyyat İnstitutunun əməkdaşları Şəhidlər Xiyabanını ziyarət ediblər

19.01.2026 / Mühüm xəbərlər

AR Elm və Təhsil Nazirliyi Riyaziyyat İnstitutunun əməkdaşları 20 Yanvar Ümumxalq Hüzn Gününün 36-cı ildönümü ilə əlaqədar Şəhidlər Xiyabanını ziyarət ediblər. İnstitut əməkdaşları Azərbaycanın ərazi bütövlüyü uğrunda qəhrəmancasına canlarından keçən şəhidlərin əziz xatirəsini ehtiramla yad ediblər.

20 Yanvar hadisələri Azərbaycan xalqının tarixinə həm faciəli, kədərli, həm də qəhrəmanlıq, rəşadət səhifəsi kimi daxil olub, müstəqillik, azadlıq uğrunda mübarizənin və yenilməz iradənin rəmzinə çevrilib. 36 il əvvəl doğma Vətəninin, xalqının azadlığını, şərəf və ləyaqətini hər şeydən üstün tutan Azərbaycanın mərd övladları həmin qanlı gecədə canlarından keçərək şəhidlik zirvəsinə ucaldılar. Həmin gün Azərbaycan xalqı öz azadlığı və müstəqilliyi uğrunda ilk şəhidlərini verdi. Azadlığa gedən yolda həyatlarını qurban verən Vətən övladları misilsiz fədakarlıqları ilə xalqımızın qəhrəmanlıq salnaməsinə tarixi səhifə yazdılar.

Vətən uğrunda canlarını fəda edən şəhidlərin əziz xatirəsi hər bir azərbaycanlının qəlbində daim yaşayacaq və heç zaman unudulmayacaq!