OpenAI data mərkəzləri üçün enerji xərclərini özü ödəyəcək

22.01.2026 / Maraqlı məlumatlar

OpenAI bildirib ki, süni intellekt üçün qurulan data mərkəzlərinin enerji xərclərini özü qarşılayacaq və bu obyektlərin yerli əhalinin elektrik qiymətlərinə təsir etməsinə yol verməyəcək. Technote.az “The Verge” platformasına istinadən bildirir ki, şirkət eyni zamanda su istifadəsini azaltmaq üçün yeni texnologiyalara yatırım edəcəyini açıqlayıb.

“Biz yaxşı qonşu olmağa çalışırıq,” - deyə OpenAI artan narazılıqlara cavab olaraq qeyd edib. Şirkətin sözlərinə görə, Stargate adlı data mərkəzləri üçün lazım olan enerji ya özəl mənbələrdən təmin olunacaq, ya da yerli enerji şəbəkələrinin gücləndirilməsi xərcləri OpenAI tərəfindən ödəniləcək.

Data mərkəzlərinin soyudulması üçün böyük həcmdə, bəzən içməli suyun istifadə olunması isə icmalarda əsas narahatlıq doğuran mövzulardan biridir. OpenAI bu problemin “soyutma sistemlərində innovasiyalar və daha səmərəli süni intellekt dizaynları” ilə azaldıla biləcəyini bildirib.

Bu açıqlama Microsoft-un yaxın vaxtlarda oxşar icma öhdəlikləri təqdim etməsindən sonra gəlib. Texnologiya şirkətləri süni intellekt infrastrukturlarını genişləndirməyə çalışdıqca, data mərkəzlərinə qarşı yerli etirazlar da artmaqdadır. Bəzi hallarda bu narazılıqlar layihələrin tamamilə dayandırılmasına belə səbəb olub.