Cənubi Koreyada "dünyanın ilk Sİ təhlükəsizliyi barədə qanun" qüvvəyə mindi
22.01.2026 / Maraqlı məlumatlar
Cənubi Koreya dünyada süni intellektin (Sİ) təhlükəsiz istifadəsini tənzimləyən hərtərəfli qanun qəbul edən ilk ölkə olub.
Oxu.Az xəbər verir ki, bu qiymətləndirmə "Yonhap" xəbər agentliyinə məxsusdur.
"Süni intellektin inkişafı və etimad təməlinin yaradılması fondu haqqında əsas qanun" adlanan bu sənədin müxtəlif qaydalar toplusu deyil, dünyanın ilk "hərtərəfli qanunu" olduğu vurğulanır. Sənəddə generativ Sİ məhsulları üçün texnologiya şirkətlərinin riayət etməli olduğu hüquqi çərçivə və tələblər, eləcə də onları pozmağa görə cəzalar sadalanır.
Xüsusilə, generativ modellər tərəfindən yaradılan məzmun müvafiq "su nişanı" ilə işarələnməlidir. Qanuna görə, şirkətlər potensial müştərilərə xidmətlərinin Sİ-yə əsaslandığını bildirməli və eyni zamanda, onların təhlükəsizliyini təmin etməlidirlər.
Nəşrin qeyd etdiyi kimi, hüquqi şəxslər və mütəxəssislər Sİ-dən istifadə etməklə yaradılan dipfeyklərin və feyklərin yayılmasının qarşısını almaq üçün "daha böyük məsuliyyət daşıyırlar". Hakimiyyət orqanlarına, həmçinin bu cür pozuntularla bağlı işləri araşdırmaq hüququ verilib.
