Microsoft Xbox tətbiqini ARM əsaslı Windows 11 kompüterlərə gətirdi

23.01.2026 / Maraqlı məlumatlar

Technote.az “Engadget” platformasına istinadən bildirir ki, Microsoft ARM əsaslı Windows 11 kompüterlər üçün Xbox app tətbiqinin rəsmi olaraq istifadəyə verildiyini elan edib. Bu addım 2025-ci ilin dekabrında Prism emulyatoruna edilən böyük yeniləmədən sonra mümkün olub. Həmin yeniləmə x86 və x64 tətbiqlərin ARM arxitekturasına çevrilməsini daha effektiv edir və oyun performansı üçün vacib olan AVX və AVX2 dəstəyini əlavə edir.

Yeni imkanlar sayəsində Windows on Arm istifadəçiləri Xbox tətbiqi üzərindən PC oyunlarını ala, yükləyə və “cloud gaming” vasitəsilə oynaya biləcəklər. Microsoft bildirir ki, artıq Game Pass kataloqundakı oyunların 85 faizdən çoxu ARM əsaslı kompüterlərdə problemsiz işləyir.
Maraqlı məqamlardan biri də budur ki, Windows on Arm platforması Epic Easy Anti-Cheat kimi anti-cheat sistemlərini də dəstəkləyir. Bu isə onu SteamOS ilə müqayisədə onlayn multiplayer oyunlar baxımından daha geniş imkanlara sahib edir.

technote.az