Alimlərdən yeni kəşf - Mis məftillər tarix olacaq
28.01.2026 / Maraqlı məlumatlar
Kaliforniya Universitetinin mühəndisləri istilik ötürülməsi sahəsində mühüm kəşf ediblər.
Lent.az xəbər verir ki, onlar teta fazalı tantal nitrit adlı yeni materialın indiyə qədər ölçülmüş ən yüksək istilik keçiriciliyinə malik metal olduğunu açıqlayıblar.
Bu materialın istilik keçiriciliyi təxminən 1.100 W/mK təşkil edir ki, bu da sənaye standartı sayılan misdən (≈400 W/mK) təxminən 3 dəfə yüksəkdir.
Alimlərin sözlərinə görə, tantal və azot atomlarının xüsusi altıbucaqlı atomik quruluşu istilik enerjisinin material daxilində minimum müqavimətlə və çox sürətli hərəkət etməsinə imkan verir.
Kəşfin xüsusilə yüksək güclü prosessorlar və süni intellekt çiplərində həddən artıq isinmə problemini azaltmaqda mühüm rol oynayacağı, daha kompakt və səmərəli elektron cihazların hazırlanmasına yol açacağı gözlənilir.
