AMEA İdarəetmə Sistemləri İnstitutundan ordumuza dəstək

06.10.2020 / Xəbərlər

27 sentyabr səhər saat 6 radələrindən başlayaraq Ermənistan silahlı qüvvələrinin cəbhə xətdində Azərbaycan Ordusunun mövqelərini və yaşayış məntəqələrini iriçaplı silahlar, minaatanlar və müxtəlif çaplı artilleriya qurğularından intensiv atəşə tutması nəticəsində atəşkəs rejimi pozulub. Cəbhənin müxtəlif yerlərindən açılan intensiv atəş nəticəsində mülki əhali arasında həlak olan və yaralananlar olub, mülki infrastruktur obyektlərinə ciddi ziyan dəyib.

Ali Baş Komandan İlham Əliyevin rəhbərliyi ilə Azərbaycan Ordusu işğal olunmuş Qarabağ torpaqlarımızda uğurlu döyüş əməliyyatları apararaq 30 ilə yaxın davam edən həsrətə son qoymaqdadır. Ard-arda gələn qələbələr hər bir azərbaycanlıda böyük qürur və sevinc hisləri yaradır.

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin imzaladığı müvafiq Fərman ilə ölkədə 28 sentyabrdan hərbi vəziyyət rejimi qüvvəyə minib. Milli Ordumuza dəstək olmaq məqsədilə AMEA-nın İdarəetmə Sistemləri İnstitutunun kollektivi və institutun nəzdində fəaliyyət göstərən Xüsusi Konstruktor Bürosu  Azərbaycan Silahlı Qüvvələrinə Yardım Fonduna 17 800 manat vəsait köçürüblər.

Biz inanırıq ki, Ali Baş komandanın rəhbərliyi ilə  ordumuz qələbə çalacaq! Ordumuza və Prezidentimizə dəstək olmağa hər zaman hazırıq!