Microsoft AI şirkətləri və nəşriyyatlar arasında yeni körpü qurur

05.02.2026 / Maraqlı məlumatlar

Technote.az “The Verge” platformasına istinadən bildirir ki, Microsoft süni intellekt modellərinin təlimində və “grounding” prosesində istifadə olunan məzmun üçün yeni bir lisenziyalaşdırma platforması üzərində işlədiyini açıqlayıb. Publisher Content Marketplace (PCM) adlanan bu sistem, media qurumlarının AI şirkətləri üçün məzmun istifadə şərtlərini açıq şəkildə göstərməsinə imkan verəcək.

PCM vasitəsilə süni intellekt istehsalçıları hansı məzmunun hansı şərtlərlə istifadə oluna biləcəyini asanlıqla görə və birbaşa lisenziya razılaşmaları bağlaya biləcək. Eyni zamanda, nəşriyyatlar məzmunlarının istifadəsi ilə bağlı statistik hesabatlar əldə edəcək ki, bu da qiymətlərin daha düzgün müəyyənləşdirilməsinə kömək edəcək. Microsoft bildirir ki, bu platforma Vox Media, Associated Press, Condé Nast, People və digər iri media qurumları ilə birlikdə hazırlanıb. Qeyd edək ki, süni intellektin sürətli inkişafı əsasən ödənişsiz şəkildə toplanmış onlayn məzmun hesabına baş verib və bu, bir çox media şirkətinin hüquqi addımlar atmasına səbəb olub.
Məsələn, The New York Times və The Intercept həm Microsoft-a, həm də OpenAI-a qarşı müəllif hüquqları ilə bağlı məhkəmə iddiaları qaldırıb. Digər nəşriyyatlar isə artıq lisenziya müqavilələri bağlamağa üstünlük verib. Bundan əlavə, nəşriyyatların dəstəklədiyi Really Simple Licensing (RSL) adlı açıq standart da mövcuddur. Bu standart saytların özündə botlar üçün ödəniş və istifadə qaydalarını müəyyən etməyə imkan verir. Lakin Microsoft-un açıqlamasında RSL ilə PCM-in necə inteqrasiya olunacağı barədə məlumat verilməyib.

technote.az