Azərbaycan Universiteti yaz semestrində iki elmi konfrans keçirəcək

05.02.2026 / Xəbərlər

Azərbaycan Universitetində 2025/2026-cı tədris ilinin yaz semestri ərzində iki elmi konfransın keçirilməsi planlaşdırılıb.

Universitetdən AZƏRTAC-a bildirilib ki, konfranslardan biri beynəlxalq, digəri isə respublika səviyyəlidir.

Martın 11-də keçiriləcək Gənc tədqiqatçıların IX elmi konfransının məqsədi ölkənin müxtəlif universitet, akademiya və elmi-tədqiqat institutlarında fəaliyyət göstərən gənc tədqiqatçıları bir araya gətirmək, onların uğurlarını və təcrübələrini paylaşmaqdır. Gənc alim və tədqiqatçılar iqtisadiyyat, humanitar, sosial elmlər və İKT sahələri üzrə tezislərini konfransa təqdim edə bilərlər.

Mayın 4-5-də “The Future of Higher Education: Global Perspectives, Local Impact” beynəlxalq konfransı isə ali təhsilin gələcəyinə dair müasir trendləri, innovativ yanaşmaları və yerli reallıqların qlobal dəyişikliklərlə qarşılıqlı təsirini müzakirə etmək məqsədilə təşkil olunur. Azərbaycan Universiteti ilə Elm və Ali Təhsil üzrə Dövlət Agentliyi tərəfindən birgə keçirilən konfransda ali təhsil sistemlərinin modernləşdirilməsi, rəqəmsal transformasiya, beynəlmiləlləşmə və əmək bazarının yeni tələblərinə uyğun bacarıqların inkişafı istiqamətində fikir mübadiləsi aparılacaq, tədqiqatların nəticəsi müzakirə olunacaq.

azertag.az