İdarəetmə Sistemləri İnstitutunun Yeni Azərbaycan Partiyası təşkilatının iclası keçirilmişdir
29.10.2020 / Xəbərlər28 oktyabr 2020-ci il tarixində İdarəetmə Sistemləri İnstitutunun YAP təşkilatının iclası keçirilmişdir.
Əvvəlcə Vətən uğrunda şəhid olmuş Azərbaycan əsgərlərinin və dinc əhaliyə yönəlmiş erməni təcavüzü nəticəsində həyatlarını itirmiş həmvətənlərimizin xatirəsi 1 dəqiqəlik sükutla yad olunub.
İnstitutun YAP təşkilatının sədri Zülalə Cəbiyeva çıxış edərək təşkilat üzvlərinin il ərzində yerinə yetirdiyi və son 1 ay ərzində ordumuza dəstək olaraq görülən işlərdən söz açmışdır. O, İnstitut əməkdaşlarının son bir ayda ölkəmizdə baş verən proseslərdə yaxından iştirak etdiyini, ilk müharibə günlərindən başlayaraq Qarabağ həqiqətlərini xarici ölkələrdə yaşayan alimlərə çatdırdıqlarını və ordumuza dəstək olmaq üçün əllərindən gələn köməyi əsirgəmədiklərini söyləmişdir.
“Neft və qaz məhsullarının nəqli prosesinin nəzarət və ölçü vasitələrinin yaradılması” laboratoriyasının rəhbəri, t.ü.f.d. İsayev Məzahir 80-ci illərdən bu günlərə kimi ermənilərin azərbaycanlılara qarşı həyata keçirdiyi siyasi və hərbi təxribatlar haqqında və ən yüksək silah və texnika ilə təchiz olunan ordumuzun cəbhədə göstərdiyi yüksək qəhrəmanlıq şücaətindən danışmışdır.
“İdarəetmənin riyazi məsələləri” laboratoriyasının rəhbəri, r.e.d. professor İlqar Məmmədov öz çıxışında Azərbaycan xalqının başda Ali Baş Komandan olmaqla yeni tarix yazdığını və 30 ildə qayıdmayan torpaqlarımızın son 30 gün ərzində qayıtdığından söz açmış və xalqımızın öz Prezidenti ətrafında yumruq kimi birləşdiyini və ordumuzun qələbəsinə inandığını söyləmişdir.
“Elmi-texniki informasiya və patent tədqiqatları” şöbəsinin rəhbəri, t.ü.f.d., dosent Rəna Əsədova çıxışında cənab İlham Əliyevin Ali Baş Komandan kimi döyüş əməliyyatlarına uğurla rəhbərlik etməklə yanaşı, dərin intellekti, peşəkarlığı və iradəsi ilə diplomatik cəbhədə də yorulmadan çalışdığını, Azərbaycanın haqq səsini bütün dünyaya bəyan etdiyini və bu gün dünyanın seçilən dövlət başçıları arasında ən ləyaqətli dövlət başçılarından biri olduğunu söyləmişdir.
İnstitutun böyük elmi işçisi, r.ü.f.d. Rəhilə Sadıqova çıxışında Ermənistanın öz məğlubiyyətini həzm edə bilmədiyini, hər zamankı xislətinə sadiq olduğunu və cinayət əməllərini ortaya qoyaraq, hər dəfə yeni təxribatlara əl atdığını, döyüş bölgəsindən kənarda yerləşən yaşayış məntəqələrini, mülki əhalini hədəfə alması barədə söz açmışdır.
“İctimaiyyətlə Əlaqələr” şöbəsinin rəhbəri, i.ü.f.d. Aygün Əliyeva çıxış edərək institutun gənc alimlərinin informasiya savaşında fəal iştirakı barədə məlumat vermiş və Dağlıq Qarabağ müharibəsi ilə bağlı obyektiv məlumatların dünya ictimaiyyətinin diqqətinə çatdırılması məqsədilə xaricdə fəaliyyət göstərən elmi mərkəzlərə, görkəmli alim və mütəxəssislərə alimlər tərəfindən xüsusi məktubun hazırlanıb ünvanlandığını söyləmişdir. A.Əliyeva çıxışını özü yazdığı “Azərbaycan Yaşa! Vətənim Yaşa” şeri ilə bitirmişdir.