“Epstein Files” sənədləri Gmail formatında təqdim olunub

12.02.2026 / Maraqlı məlumatlar

Technote.az “Mashable” platformasına istinadən bildirir ki, “Epstein Files” adı ilə tanınan sənəd açıqlamaları son aylarda yenidən gündəmdədir. ABŞ Ədliyyə Nazirliyi (Department of Justice) yanvarın 30-da bu işlə bağlı növbəti böyük sənəd paketini yayımlayıb. Yeni açıqlanan materiallar 3,5 milyon səhifədən ibarətdir və onların arasında 180 min yeni şəkil və 2 min video fayl da var.

Bu qədər böyük həcmdə sənədlərin içində konkret məlumat tapmaq isə demək olar ki, mümkün deyil. Minlərlə PDF, skan olunmuş sənəd və mətn faylı arasında axtarış aparmaq həm vaxt aparır, həm də texniki cəhətdən çətindir.
2025-ci ilin noyabrında, Nümayəndələr Palatasının Nəzarət Komitəsi tərəfindən sənədlərin əvvəlki paketi yayımlandıqdan dərhal sonra, Wired jurnalının “prankster” kimi təqdim etdiyi Riley Walz və proqramçı Luke Igel birlikdə Jmail layihəsini istifadəyə veriblər. Jmail mahiyyət etibarilə Gmail interfeysinin klonudur. Layihə istifadəçilərə Jeffrey Epstein-in [email protected] hesabına daxil olmuş kimi onun e-poçt qutusunu vizual olaraq “real Gmail” mühitində görmək imkanı yaradır.
Layihənin əsas üstünlüyü isə təkcə vizual təqdimat deyil. Jmail vasitəsilə istifadəçilər axtarış sətrində ad, açar söz və digər detalları yazaraq konkret məktubları asanlıqla tapa bilirlər. İnterfeys “Inbox” və “Sent” bölmələri ilə gələn və göndərilən məktubları ayırır. “Starred” bölməsi isə istifadəçilərin ən maraqlı hesab etdiyi yazışmaların bir növ kollektiv siyahısını təqdim edir. Hətta “People” adlı bölmə vasitəsilə Epstein-lə yazışan tanınmış şəxslərin siyahısını görmək mümkündür. Beləliklə, milyonlarla sənəd arasında itmək əvəzinə, istifadəçilər strukturlaşdırılmış və rahat axtarıla bilən bir platforma vasitəsilə məlumatları araşdıra bilirlər.

technote.az