OpenClaw-un yaradıcısı ChatGPT-nin komandasına qoşuldu
16.02.2026 / Maraqlı məlumatlar
OpenAI şirkətinin rəhbəri Sam Altman OpenClaw layihəsinin yaradıcısı Peter Steinbergerin komandaya cəlb olunduğunu açıqlayıb.
O, bu barədə sosial şəbəkə X (əvvəlki Twitter) hesabında məlumat yayıb.
Ştaynbeger şirkətdə “növbəti nəsil süni intellekt agentləri”nin hazırlanması istiqamətinə rəhbərlik edəcək. Altmanın sözlərinə görə, agent texnologiyaları gələcəkdə OpenAI məhsullarının əsas təməl platformasına çevrilə bilər.
Ştaynbeger özü də korporativ bloqda OpenAI-yə keçidini təsdiqləyib. O bildirib ki, OpenClaw ətrafında böyük şirkət qurmaq niyyətində deyil və diqqətini texnologiyaların inkişafına yönəltməyi üstün tutur. Onun sözlərinə görə, OpenAI-də əsas vəzifəsi süni intellekt agentləri ilə qarşılıqlı əlaqəni sadələşdirmək olacaq. Bunun üçün yanaşmaların dərin şəkildə yenilənməsi, qabaqcıl modellərə çıxış və təhlükəsizlik məsələlərinə xüsusi diqqət tələb olunacaq.
OpenClaw layihəsi xüsusi yaradılmış fondun idarəsinə veriləcək və açıq mənbə kodlu, müstəqil həll kimi fəaliyyətini davam etdirəcək.
OpenClaw 2026-cı ilin yanvarında geniş tanınıb. Platforma müxtəlif tərtibatçıların modelləri əsasında avtonom agentləri işə salmağa və onlarla messencerlər vasitəsilə qarşılıqlı əlaqə qurmağa imkan verir. Anthropic şirkətinin müraciətindən sonra layihə bir neçə dəfə ad dəyişib — Clawdbot, daha sonra Moltbot və nəhayət OpenClaw adını alıb.
