OpenClaw-ın qurucusu OpenAI-a qoşulur
17.02.2026 / Maraqlı məlumatlar
Technote.az “The Verge” platformasına istinadən bildirir ki, Sam Altman X-də açıqlayıb ki, süni intellekt agenti OpenClaw-ın yaradıcısı Peter Steinberger artıq OpenAI komandasında fəaliyyət göstərəcək. Altman bildirib ki, Ştaynberqerin agentlərin bir-biri ilə qarşılıqlı əlaqəsi ilə bağlı “çox möhtəşəm ideyaları” var və gələcəyin “çox-agentli” sistemlər üzərində qurulacağını vurğulayıb. Onun sözlərinə görə, agentlərin əməkdaşlıq edə bilməsi tezliklə OpenAI məhsullarının əsas hissəsinə çevriləcək.
OpenClaw (əvvəllər Moltbot və Clawdbot kimi tanınırdı) bu ilin əvvəlində texnologiya dünyasında sürətlə populyarlıq qazandı. Layihənin yüksəlişi sürətli olsa da, müəyyən problemlərlə də üzləşdi. Bu ayın əvvəlində tədqiqatçılar ClawHub platformasında 400-dən çox zərərli bacarığın yükləndiyini aşkarlayıblar. Bundan əlavə, platforma MoltBook adlı sosial şəbəkəni istifadəyə verib. Burada süni intellekt agentləri “insanlardan şikayət edir”, şüurun sübut edilə bilməsi barədə mübahisələr aparır və öz aralarında fikir mübadiləsi üçün “özəl məkanın” vacibliyini müzakirə edirdilər. Lakin platforma qısa müddətdə insanlar tərəfindən infiltrasiya olunub.
Ştaynberqer şəxsi bloqunda yazıb ki, OpenAI-a qoşulmaq ona süni intellekt agentlərini geniş kütlələrə çatdırmaq məqsədini daha sürətli reallaşdırmağa imkan verəcək və şirkət idarəçiliyinin yaratdığı çətinliklərdən azad edəcək. O bildirib ki, böyük bir şirkət qurmaq ideyası onu artıq həyəcanlandırmır: “Mən yaradıcıyam. 13 ilimi şirkət qurmağa sərf etmişəm. Məqsədim böyük şirkət yaratmaq deyil, dünyanı dəyişməkdir və OpenAI ilə əməkdaşlıq bunu hamıya çatdırmağın ən sürətli yoludur”.
