Pentaqon Maskın süni intellekt şirkətindən hərbi məqsədlər üçün istifadə edəcək
25.02.2026 / Maraqlı məlumatlar
Amerikalı sahibkar İlon Maskın Süni İntellekt (Sİ) şirkəti olan "xAI" "Grok" neyron şəbəkəsini məxfi hərbi sistemlərə inteqrasiya etmək üçün Pentaqonla müqavilə imzalayıb.
Oxu.Az xəbər verir ki, bu barədə "Axios" məlumat yayıb.
Məlumata görə, rəqiblərindən fərqli olaraq, Maskın şirkəti Pentaqonun Sİ-ni etik normalar daxilində məhdudlaşdırılmadan istənilən qanuni məqsədlər üçün istifadə etmək tələbi ilə razılaşıb.
Bu, modelin kütləvi izləmə və tam avtonom silahların işlənib hazırlanması tətbiqinə yol açır.
Əvvəllər hərbi seqmentdə istifadə edilən yeganə Sİ "Anthropic" şirkətinin "Claude" modeli olub. Lakin sözügedən şirkət proqram təminatının qeyri-etik məqsədlər üçün istifadəsinə qoyulan məhdudiyyətləri aradan qaldırmaqdan imtina edib. Bu səbəbdən şirkətin Pentaqonla danışıqları baş tutmayıb.
Məlumata görə, ABŞ Hərb Nazirliyi hazırda "Google" və "OpenAI" ilə danışıqlar aparır.
Qeyd olunur ki, "Google"-nin "Gemini" modelinin məxfi istifadəsi üçün tərəflər razılığa yaxındır.
"Axios" iddia edir ki, ABŞ Administrasiyası bütün süni intellekt şirkətlərindən onların standartlarının qeyd-şərtsiz qəbul olunmasını tələb edir. "OpenAI" rəhbərliyinin məsələ ilə bağlı hansı addımı atacağı bəlli deyil.
