“Elm” qəzetinin xüsusi buraxılışı çap edilib
06.03.2026 / Xəbərlər
AMEA-nın Rəyasət Heyətinin həftəlik mətbu orqanı olan “Elm” qəzetinin 6 mart 2026-cı il tarixli xüsusi buraxılışı çapdan çıxıb.
Bu sayın ön səhifəsində “Birinci Türkoloji Qurultayın 100 illik yubileyinin keçirilməsi haqqında” Azərbaycan Respublikası Prezidentinin Sərəncamı yer alır.
Xüsusi buraxılışın ilk səhifələrində AMEA Rəyasət Heyətinin sözügedən Sərəncamdan irəli gələn vəzifələrin icrası ilə bağlı qərarları, o cümlədən Tədbirlər planı haqqında rəsmi məlumatlar dərc edilib.
“Elm” qəzetinin bu nömrəsində “Birinci Türkoloji Qurultayın qurucuları və dərsləri: tarix və müasirlik” mövzusunda keçirilən beynəlxalq elmi konfrans haqqında geniş icmal və konfransın panel iclaslarında səsləndirilən məruzələrin xülasəsi təqdim olunub. Həmçinin qəzetdə türk dövlətlərindən gələn və beynəlxalq elmi konfransın iştirakçısı olan alimlərin Birinci Türkoloji Qurultayın ümumtürk həmrəyliyi, milli düşüncə birliyi və türk xalqlarının elmi-mədəni inteqrasiyası baxımından əhəmiyyətini vurğulayan müsahibələri işıqlandırılıb.
Xüsusi buraxılışda AMEA-nın prezidenti akademik İsa Həbibbəyli ilə “Bakı Türkoloji Qurultayının tarixi dərsləri və müasir dövr” başlıqlı müsahibə yer alır.
Bu sayda türkologiya elminin aktual problemləri, ortaq türk əlifbasına keçid prosesindən bəhs edən nəşrlər oxucuların diqqətinə çatdırılıb.
Qəzetin rus və ingilis dili bölmələrində də qurultayın yubileyi münasibətilə keçirilən beynəlxalq tədbirləri əks etdirən yazılar dərc edilib.
