AMEA İdarəetmə Sistemləri İnstitutunun Elmi Şurasının iclası keçirildi
11.12.2020 / Elmi şuranın iclasları11 dekabr 2020-ci il tarixində AMEA İdarəetmə Sistemləri İnstitutunun Elmi Şurasının online iclası keçirilmişdir. İclası İnstitutun direktoru, akademik Telman Əliyev açaraq şura üzvlərini bir daha Azərbaycan xalqının qələbəsi ilə təbrik etdi və möhtəşəm Qələbə Paradından söz açdı.
Sonra T. Əliyev İdarəetmə Sistemləri İnstitutunun elmi və elmi-təşkilati fəaliyyəti haqqında 2020-ci ilin hesabatını təqdim etdi. Akademik İnstitutda 5 il ərzində (2016-2020) aparılan 17 mövzu, 39 iş və 28 mərhələ üzrə elmi-tədqiqat işlərinin 2020-ci ildə başa çatdırıldığını qeyd etdi. T. Əliyev həmçinin, 2020-ci ildə Web of Science bazasında – 59, Scopus bazasında – 23 elmi əsərin çap edildiyini və 25 noyabr 2020-ci il tarixinə kimi İnstitutun alimlərinin əsərlərinə Web of Science bazasında - 382 və Google Scholar bazasında - 1062 istinad verildiyini şura üzvlərinin diqqətinə çatdırmışdır. Direktor İnstitutun doktoranturasında 54 nəfərin, onlardan 13 doktorant və 41 dissertant olduğunu, və magistraturasında 14 nəfərin təhsil aldığını söyləmişdir.
İclasın ikinci hissəsində T. Əliyev İnstitutun 2020-ci il ərzindəki nailiyyətlərini qeyd etmiş və AMEA-nın iqtisadi səmərə verə bilən və tətbiqi imkanları əhəmiyyəti yüksək olan, elmtutumlu problemlərə yönəlmiş strategiyasının bu gün İdarəetmə Sistemləri İnstitutunda da yerinə yetirildiyini söyləmişdir.
İclasda AMEA-nın akademik-katibi Əminağa Sadıqov çıxış etmişdir. O, başda Telman Əliyev olmaqla şura iştirakçılarını Zəfər münasibəti ilə təbrik etdi və Qələbə paradının məzmunu və möhtəşəmliyindən söz açdı. Ə. Sadıqov vurğuladı ki, bundan sonra alimlərin öhdəsinə daha da böyük vəzifələr düşür ki, öz elm və əməkləri ilə ölkə iqtisadiyyatına və siyasətinə hərtərəfli dəstək olsunlar. Ə. Sadıqov İnstitutun profilini nəzərə alaraq, ölkənin müdafiə qüdrətinin artırılmasında, yeni texnologiyaların, proqram təminatlarının işlənib hazırlanmasında, İnstitut alimlərinin böyük rolu olduğunu və daha da geniş miqyasda imkanların olduğunu qeyd etmişdir. Akademik-katib İnstitutun alimləri tərəfindən yerinə yetirilən elmi-tədqiqat işlərini yüksək qiymətləndirmiş və onlara gələcək işlərində müvəffəqiyyət arzu etmişdir.
Sonra Elmi Şuranın Protokolundan irəli gələn məsələlər müzakirə edilmişdir.