YAP Yasamal rayon təşkilatında gənclərlə görüş keçirilib
11.03.2022 /
Yeni Azərbaycan Partiyası Yasamal rayon təşkilatında “Milli maraqlar və xarici siyasət” mövzusunda YAP İdarə Heyətinin üzvü, Milli Məclisin Gənclər və idman komitəsinin sədr müavini Şahin İsmayılov ilə gənclərin görüşü keçirilib.
YAP Yasamal rayon təşkilatının sədri Bəxtiyar Nəbiyev çıxışında vurğulayıb ki, dövlət gənclər siyasətinin ən mühüm istiqamətlərindən biri ölkəmizdə gənc nəslin vətənpərvər ruhda tərbiyəsidir: "Həmin sahədə keçirilən kütləvi tədbirlər, maarifləndirmə və təbliğat işləri biləvasitə gənclərin mənəvi, fiziki, psixoloji hazırlığının təmin edilməsinə, onlarda vətənə, doğma torpağa məhəbbət hissinin yüksəldilməsinə, eləcə də müasir dünyamızda qloballaşmanın geniş vüsət aldığı bir zamanda milli-mənəvi dəyərlərin qorunub saxlanmasına yönəldilir".
B.Nəbiyev qeyd edib ki, vətənpərvərlik tərbiyəsi həmçinin gənc nəslin mənsub olduğu milli dəyərlərə, tarixi ənənələrə bağlılığını da özündə ehtiva edir: "Vətənin tarixi keçmişini dərindən bilmək, milli dəyərlərinə sahib olmaq, adət-ənənələrini öyrənmək, maddi və mənəvi sərvətlərini qorumaq vətənpərvər insanı səciyyələndirən ən mühüm keyfiyyətlərdəndir. Bu keyfiyyətləri gənclərə aşılamaq üçün isə gənc nəslin tarixi yerlərə gəzintisini təşkil etmək, tarixi günlərə həsr olunmuş tədbirlər keçirmək böyük əhəmiyyət kəsb edir".
Görüşdə təhsil sahəsindən danışan B.Nəbiyev xaricdə təhsil üzrə yeni Dövlət Proqramının artıq təsdiqləndiyini və tələbələrin artıq bundan istifadə edə biləcəyini vurğulayıb. Qeyd edib ki, gənclərin yüksək səviyyədə təhsil alması Cənab Prezident İlham Əliyevin hər zaman diqqət mərkəzindədir və görülən işlər bunun bariz göstəricisidir.
Çıxış edən YAP İdarə Heyətinin üzvü, Milli Məclisin Gənclər və idman komitəsinin sədr müavini Şahin İsmayılov beynəlxalq ictimaiyyətin 30 illik işğal boyunca Azərbaycanın mövqeyinə qeyri-səmimi yanaşmasından, işğalçı ilə işğala məruz qalan arasında fərq qoyulmamasından danışıb. Bildirib ki, Prezident İlham Əliyev bütün dövrlərdə Azərbaycanın Qarabağ problemini və ümümilikdə ərazi bütövlüyünün bərpası üçün strategiyalar qurub. Buna misal olaraq Azərbaycanın tolerant bir dövlət kimi dünyaya tanıdılması, ordunun və ən əsası ölkə iqtisadiyyatının inkişafının təmin edilməsini göstərmək olar.
Ş.İsmayılov gənclərin müasir dünyada tutacaqları mövqe və perspektivləri haqda da danışıb. Qloballaşmanın Azərbaycan gəncliyinə göstərdiyi müsbət və mənfi cəhətlərə toxunub. Müasir dövrdə sosial şəbəkələrin və ümumilikdə beynəlxalq medianın gənclərə idealoji təsir baxımından böyük rolunun olduğunu bildirən deputat bundan yayınmanın yollarını gənclərlə bölüşüb.
Daha sonra müzakirə formatında keçən görüşdə gənclərin sualları cavablandırılıb, təkliflər səsləndirilib. Müzakirələrdə AMEA İdarəetmə Sistemləri İnstitutunun (İSİ) Gənc Alim və Mütəxəssislər Şurasının Sədri (GAMŞ) Lamiyə Nəcəfova da iştirak etmişdir.
Sonda xatirə şəkli çəkdirilib.
