OpenAI ChatGPT tərəfindən tərtib edilən mətnləri təyin edə biləcək sistem üzərində çalışır
02.02.2023 /
Olduqca qəliz mətnlər tərtib etməyi bacaran süni zəka əsaslı ChatGPT çat-botunun yaradıcısı OpenAI şirkəti bu və ya digər mətnin mənbəyini təyin edə biləcək sistem üzərində çalışdığını elan edib. OpenAI təmsilçilərinin sözlərinə əsasən hazırlanan yeni sistem süni zəka tərəfindən tərtib edilmiş mətni dəqiq şəkildə təyin edə bilir. Qeyd etmək lazımdır ki, şirkət sözügedən sistemi ChatGPT-nın istifadəyə verilməsindən bir neçə ay sonra hazırlamağa başlayıb. ChatGPT-nın istifadəyə verilməsindən bir neçə müddət sonra təhsil müəssisələri buna sürətlə reaksiya verərək öz tələbələrinə sözügedən çat-botdan istifadəni qadağa etdilər. Hətta bəzi təhsil müəssisələrində ChatGPT-dan istifadə məhdudlaşdırıldı.
Belə ki, təhsil müəssisələrinin rəhbərləri narahatdırlar ki, süni zəka əsaslı bu çat-bot tələbələrin təhsil proseslərinə mənfi təsir göstərəcək. Nəticədə OpenAI şirkəti bu məsələdə mütəxəssislərə yardım etmək qərarına gəlib. Məlumatda qeyd edilib ki, ChatGPT tərəfindən tərtib edilən mətnlərin təyin edilməsi imkanını verəcək sistem hazırlanma prosesindədir və hələ ideal şəkildə çalışmır. Şirkət öz növbəsində valideynlər və müəllimlər tərəfindən geridönüşlərə ümid edir. OpenAI şirkətinin öz qiymətləndirməsinə əsasən ingilis dilində olan mətnlərdən ibarət nümunələrin yoxlanılması zamanı sistem süni zəka tərəfindən tərtib edilmiş mətnlərin 26%-ni uğurlu şəkildə təyin edə bilir. Bu halda sistem həmin mətnləri “mətnlər ehtimal ki, süni zəka tərəfindən tərtib edilib” kimi qiymətləndirir.
Bununla belə sistem əslində insanlar tərəfindən tərtib edilmiş mətnlərin 9%-ni süni zəka tərəfindən tərib edilmiş mətnlər kimi qiymətləndirib. Qeyd etmək lazımdır ki, şirkət hələ 2019-cu ildə süni zəka tərəfindən tərtib edilən mətnlərin təyini üçün nəzərdə tutulmuş sistemi təqdim etmişdi. OpenAI mütəxəssislərinin sözlərinə əsasən sistemin yeni versiyası bu işin öhdəsindən daha yaxşı gəlir. Məlumdur ki, sistem 1000 simvoldan daha az simvola sahib mətnlərin analizində çətinliklər çəkir. Bununla yanaşı OpenAI sistemi ingilis dilindən başq digər dillərdə istifadə etməyi məsləhət görmür. Əlavə olaraq qeyd etmək lazımdır ki, istifadəçi süni zəka tərəfindən tərtib edilmiş mətni fərdi şəkildə bir qədər dəyişə bilər. Bu isə mətnin analiz prosesini daha da qəlizləşdirir.
