Miçiqan Universiteti və Rays Universitetinin mühəndisləri böyük miqdarda kimyəvi maddələrdən istifadə etməyərək dəniz suyunu içməli suya çevirməyə imkan verən texnologiyanı hazırlayıblar. Bu texnologiya içməli suyun istehsalı sahəsindəki xərcləri azalda və onu daha əlçatan edə bilər. Dəniz suyunun tərkibində bor elementi mövcuddur. Bu element isə böyük miqdarda olduğu halda insan və bitkilər üçün çox zərərlidir. Suyun təmizlənməsi ilə məşğul olan qurğular adətən suya qələvilər əlavə edirlər. Bu, bor turşusunun ionlaşdırılması üçün edilir.

   

Daha sonra ionlaşdırılmış bor əks osmos (əks osmos istənilməyən maddələri, su molekullarından daha böyük olan molekulları sudan ayıran yarımkeçirici membran təbəqəsi ilə suyun təmizlənməsi prosesidir) prosesi sayəsində suyun tərkibindən çıxarılır və daha sonra suyun özü turşu vasitəsilə neytrallaşdırılır. Mütəxəssislər tərəfindən hazırlanmış yeni texnologiya isə boru sudan karbon parçasının elektrodları vasitəsilə çıxarır. Bu halda prosesə kimyəvi maddələrin əlavə edilməsinə ehtiyac qalmır.

 

Bu öz növbəsində suyun təmizlənməsi prosesini sadələşdirir və ona sərf olunan xərcləri aşağı salır. Sözügedən texnologiyanın tətbiqi suyun təmizlənməsi prosesinə sərf edilən xərcləri 15% aşağı sala bilər. Bu isə emal edilmiş hər kub metr su üçün 20 sent vəsaitin qənaət edilməsi deməkdir. 2019-cu ildə dünyanın su təmizləyici qurğularının ümumi performansı gün ərzində 95 milyon kub metr təşkil etmişdi. Bunu nəzərə alaraq yeni texnologiyanın tətbiqi halında il ərzində potensial olaraq 6.9 milyard dollar vəsaitə qənaət etmək olar.