İdarəetmə Sistemləri İnstitutunda magistrantların qış imtahan sessiyası uğurla başa çatmışdır
01.02.2021 / XəbərlərAzərbaycan Milli Elmlər Akademiyasının Prezidentinin 24 dekabr 2020-ci il tarixli 469 №-li “AMEA-nın magistrantları üçün qış imtahan sessiyasının keçirilməsi haqqında” sərəncamına əsasən İdarəetmə Sistemləri İnstitutunda 2020-ci il dekabrın 30-dan 2021-ci il fevralın 2-dək magistrantların 2020/2021-ci tədris ili üzrə qış imtahan sessiyası keçirilmişdir. Ölkə ərazisində tətbiq olunan xüsusi karantin rejimi nəzərə alınaraq imtahanların keçirilməsi Zoom platforması üzərindən online şəkildə təşkil edilmişdir.
Sessiya ərzində “Kömpüter elmləri” və “Proseslərin avtomatlaşdırılması mühəndisliyi” ixtisasları üzrə I kursda təhsil alan 4 magistrant ümumilikdə 8 imtahanda; “Riyaziyyat”, “Kömpüter elmləri” və “Proseslərin avtomatlaşdırılması mühəndisliyi” ixtisasları üzrə II kursda təhsil alan 10 magistrant isə ümumilikdə 16 imtahanda iştirak etmişdir.
01 fevral 2021-ci il tarixində qış imtahan sessiyasının son imtahanları I kurs magistrantlar üçün keçirilmişdir. “Kömpüter elmləri” ixtisası üzrə təhsil alan magistrantlar fənn müəllimi, AMEA-nın müxbir üzvü Kamil Ayda-zadənin tədris etdiyi “İntellektual sistemlərin müasir problemləri” fənnindən, “Proseslərin avtomatlaşdırılması mühəndisliyi” ixtisası üzrə təhsil alan magistrant fənn müəllimi, texnika üzrə fəlsəfə doktoru, dosent Tahir Əlizadənin tədris etdiyi “Kibernetika elminin tarixi və metodologiyası” fənnindən imtahanlarda iştirak etmişdir. Bütün magistrantlar yüksək qiymətləndirilmişdir. İmtahanlarda İnstitutun Təhsil Şöbəsinin rəhbəri, riyaziyyat üzrə fəlsəfə doktoru Sevinc Quliyeva da iştirak etmişdir.
Bununla da, İdarəetmə Sistemləri İnstitutunda 2020/2021-ci tədris ilinin qış imtahan sessiyası uğurla başa çatdırılmışdır.