Gənc Alim və Mütəxəssislər Şurasının “Elm Günü”nə həsr olunmuş iclası keçirilib
17.03.2021 / Xəbərlər
AMEA İdarəetmə Sistemləri İnstitutunda (İSİ) Gənc Alim və Mütəxəssislər Şurasının “Elm Günü”nə həsr olunmuş onlayn iclası keçirilib. Seminarda GAMŞ üzvləri, Təhsil və İctimaiyyətlə Əlaqələr şöbələri nümayəndələri və dəvət olunmuş qonaqlar iştirak ediblər.
Tədbir İSİ İctimaiyyətlə Əlaqələr şöbəsinin rəhbəri, i.ü.f.d Aygün Əliyevanın moderatorluğu ilə baş tutub. A.Əliyeva iştirakçıları bu əlamətdar gün münasibəti ilə təbrik edib və Elm Gününün təsis olunmasının gənclərin elmə cəlb olunmasına, elmi nailiyyətlərin təbliğinə geniş imkan yaratdığını vurğulamışdır.
İclası giriş nitqi ilə açan institutun GAMŞ sədri, r.ü.f.d. Rəşad Məstəliyev bildirib ki, ölkə başçısının sərəncamı ilə Elm Gününün təsis olunması AMEA-nın yaradıldığı günə təsadüf edərək xüsusi əhəmiyyət daşıdığını qeyd etmişdir. R.Məstəliyev tədbir iştirakçılarına Bakı Mühəndislik Universitetində (BMU) Ümummilli lider Heydər Əliyevin anadan olmasının 98-ci ildönümünə həsr olunmuş “Gənc tədqiqatçıların V beynəlxalq elmi konfransı” barədə məlumat verib.
GAMŞ sədr müavini, k.e.i. Lamiyə Nəcəfova AMEA-nın respublikada elm sahəsində aparılan fundamental tədqiqatların əsas mərkəzi olduğunu vurğulayaraq elmin inkişafında gənclərin üzərinə düşən mühüm vəzifələrdən söz açmışdır. L.Nəcəfova enerji amilinin əhəmiyyətli rolundan bəhs edərək öz tədqiqat işi barədə iclas iştirakçılarına məlumat vermişdir.
Daha sonra dəvət olunan iştirakçılardan Azərbaycan Texniki Universitetinin (AzTU) doktorantı Elnur Sadıqov məlumatların idarə olunmasına dair təqdimatla çıxış etmişdir. O, müasir dövrdə informasiya axını, məlumatların idarə olunmasının önəmini qeyd edərək bu sahədə son elmi yeniliklərdən söz açdı.
Sonra r.e.d., professor İlqar Məmmədov, r.ü.f.d., dosent Anar Rəhimov, İSİ-nin magistrantları Pünar Quliyeva və Rüstəm Əzimov çıxış edərək öz fikirlərini və təkliflərini iştirakçıların diqqətinə çatdırdılar.
Sonda Rəşad Məstəliyev Elm Günü münasibəti ilə tədbir iştirakçılarını təbrik edərək gələcək fəaliyyətlərində uğurlar arzulayıb.
