İdarəetmə Sistemləri İnstitutunda Beynəlxalq Ailə gününə həsr olunmuş tədbir keçirilib
07.05.2021 / Xəbərlər
06 may tarixində Azərbaycan Milli Elmlər Akademiyasının İdarəetmə Sistemləri İnstitutunda (İSİ) Qadınlar şurasının təşkilatçılığı ilə 15 may Beynəlxalq Ailə gününə həsr olunmuş onlayn tədbir keçirilib. Tədbirdə İnstitutun rəhbərliyi, Qadınlar şurası (QŞ), Gənc Alim və Mütəxəssislər Şurası, Həmkarlar təşkilatı, Təhsil və İctimaiyyətlə Əlaqələr şöbələrinin nümayəndələri və digərləri iştirak ediblər.
Tədbiri İSİ QŞ-nın sədri, t.ü.f.d., dosent Rəna Əsədova giriş nitqi ilə açaraq 2021-ci ilin BMT Ailə gününün mövzusunun «Rəqəmsal texnologiyaların sosial inkişaf və ailə rifahına təsiri - meqatrendlər, iqlim dəyişmələri, miqrasiya trendləri» olduğunun qeyd etdi. O, BMT Ailə gününün tarixindən danışaraq onun təsis olunmasında əsas məqsədin dünya ictimaiyyətinin diqqətini ailə problemlərinə cəlb etmək, ailədə münasibətlərin tənzimlənməsini və rifahı təmin etməkdən ibarət olduğunu bildirib. R.Əsədova qeyd edib ki, Azərbaycanda ailə siyasəti istiqamətində ölkə başçısının sərəncamları əsasında çoxsaylı dövlət proqramları, tədbirlər, sosial layihələr həyata keçirilir, komitələr yaradılır. R. Əsədova, həmçinin rəqəmsal texnologiyaların inkişafının cəmiyyətə təsiri ilə bağlı fikirlərini tədbir iştirakçıları ilə bölüşüb.
Sonra İSİ-nin icraçı direktoru, AMEA-nın müxbir üvzü Əminağa Sadıqov çıxış edərək ailə problemlərinə önəmli yerin ayrılması, bu istiqamətdə əməli tədbirlərin həyata keçirilməsinin təsadüfi olmadığını qeyd edərək, ailənin kiçik bir dövlət olduğunu və onun möhkəm olması cəmiyyətin də dayanıqlı və güclü olmasına bilavasitə təsir etdiyini qeyd edtmişdir. O, bildirib ki, Azərbaycanda ailə institutu öz dəyərləri, normaları, qadının önəmli rolu ilə seçilir və bir sıra üstün cəhətləri ilə bizi digər xalqlardan fərqləndirir.
Ə. Sadıqov qeyd edib ki, yüksək texnologiyaların yaranması inqilabi proses olaraq müsbət tendensiya kimi həyatımızın bütün sahələrində qadının rolunu artırır, məişətdə qadın əməyinin yüngülləşməsinə gətirib çıxarır. Lakin təəssüf ki, bu hal ailədaxili münasibətlərdə, xüsusən də uşaqlara diqqət və qayğı göstərilməsində müəyyən problemlərə səbəb olur. Bu istiqamətdə görülən işlərdən bəhs edən alim KİV-də nümunəvi ailə modelinin işıqlandırılmasının zəruri olduğunu vurğulayıb.
Daha sonra r.ü.f.d., dosent Gülçin Abdullayeva sosial şəbəkələrin yaranması ilə ailədə, ümumən cəmiyyətdə baş verən dəyişiklərdən söz açıb. O, qeyd edib ki, texnologiyaların inkişafı ilk öncə insanların həyatında əlverişli rol oynasa da təəssüf ki, bir çox problemlərə də yol açmış və cəmiyyəti əsaslı şəkildə dəyişmişdir. Dünya əhalisinin yarısının istifadə etdiyi sosial şəbəkələrdə yer alan saxta məlumatlardan danışan alim bildirib ki, dezinformasiyaların artması cəmiyyətdə çaşqınlığa səbəb ola bilər. G. Abdullayeva, həmçinin yoxsulluq, ana və uşaq problemlərinin azaldılması, qadınlar arasında savadlılığın artırılması və bu istiqamətdə görülən işlərdən söhbət açdı.
Tədbirdə çıxış edən r.e.d. İlqar Məmmədov iqlim, su, miqrasiya problemlərinin ailədə, ümumilikdə cəmiyyətdə törədə biləcəyi mənfi təsirlərdən söz açıb, qadının ailədəki önəmli rolundan bəhs edib.
Sonda t.ü.f.d. Rəhilə Sadıqova rəqəmsal texnologiyaların insan həyatına mənfi və müsbət təsirlərindən bəhs edib və texnologiyaların pandemiya dövründə insanların gündəlik fəaliyyətində oynadığı önəmli roldan danışıb.
