Azərbaycan Respublikasının Mərkəzi Bankı tərəfindən İdarəetmə Sistemləri İnstitutunda «Rəqəmsal ödənişlər və təhlükəsizlik tədbirləri» mövzusunda seminar keçirilib
04.06.2021 / Xəbərlər
04 iyun 2021-ci il tarixində İdarəetmə Sistemləri İnstitutunda (İSİ) Azərbaycan Respublikasının Mərkəzi Bankı tərəfindən «Rəqəmsal ödənişlər və təhlükəsizlik tədbirləri» mövzusunda maarifləndirici seminar keçirilib. Seminarda Azərbaycan Milli Elmlər Akademiyası İdarəetmə Sistemləri İnstitutunun və Azərbaycan Mərkəzi Bankının əməkdaşları iştirak ediblər. Ölkəmizdə pandemiya ilə əlaqədar tətbiq olunan xüsusi rejim nəzərə alınaraq seminar onlayn formatda Zoom platforması üzərindən həyata keçirilib.
Tədbirdə Azərbaycan Texniki Universitetinin (AzTU) İqtisadiyyat və statistika kafedrasının baş müəllimi, iqtisad üzrə fəlsəfə doktoru, İqtisadiyyat Nazirliyinin İqtisadi İslahatlar Elmi-Tədqiqat İnstitutunun baş elmi işçisi, Mərkəzi Bankın əməkdaşı Xəyaləddin Tağıyev «Rəqəmsal ödənişlər və təhlükəsizlik tədbirləri» mövzusunda təqdimatla çıxış edərək xüsusilə, müasir dövrün tələblərindən irəli gələn onlayn ödənişlər, insanların bu zaman üzləşdiyi təhlükəsizlik problemləri, o cümlədən kart məlumatlarının məxfiliyi, mühafizəsi, 3D şifrələr və digər məsələlər barədə ətraflı məlumat verib.
X. Tağıyev, həmçinin Elektron bankçılıq xidmətləri, o cümlədən mobil bankçılıq, terminal bankçılıq, telefon bankçılıq, internet bankçılıq və başqa önəmli nüanslar haqqında seminar iştirakçılarına ətraflı şəkildə faydalı məlumatlar verib. Mövzu ətrafında müzakirələr aparılıb və bir sıra suallar cavablandırılıb.
Sonda İSİ-nin icraçı direktoru, AMEA-nın müxbir üzvü Əminağa Sadıqov 2-4 iyun 2021-ci il tarixlərində İSİ-də Azərbaycan Respublikasının Mərkəzi Bankı ilə əməkdaşlıq çərçivəsində keçirilən seminarları yüksək qiymətləndirərək müasir dövrün tələbi ilə əhalinin maliyyə savadlılığının artırılmasının zəruriliyi barədə söz açıb. Ə. Sadıqov İSİ-nin müxtəlif dövlət qurumları ilə aktual istiqamətlərdə daim əməkdaşlıq etdiyini vurğulayaraq bu qəbil tədbirlərin önəminə toxunub və tədbir iştirakçılarına təşəkkürünü ifadə edib.
