İdarəetmə Sistemləri İnstitutunun Elmi şurasının növbəti iclası keçirilmişdir
29.10.2021 / Elmi şuranın iclasları29 oktyabr 2021-ci il tarixində AMEA-nın İdarəetmə Sistemləri İnstitutunun (İSİ) Elmi şurasının iclası onlayn formatda keçirilmişdir. İclasda institutun rəhbərliyi, şura üzvləri, şöbə və laboratoriya müdirləri tam heyətdə və dəvət olunmuş qonaqlar iştirak edirdilər.
İclası institutun baş direktoru, akademik Əli Abbasov açaraq gündəlikdəki məsələlər barədə tədbir iştirakçılarına məlumat verdi. Ə.Abbasov gündəlikdəki ilk məsələni təqdim etmək üçün sözü İSİ-nin icraçı direktoru, AMEA-nın müxbir üvzü Əminağa Sadıqova verdi.
Əminağa Sadıqov baş elmi işçi, r.e.d., professor, Əməkdar müəllim Tamilla Nəsirovanın və İSİ-nin “Beynəlxalq əlaqələr və innovasiya” şöbəsinin müdiri, t.ü.f.d. Tofiq Babayevin elmi fəaliyyətləri, Azərbaycan elminə bəxş etdikləri mühüm töhfələr haqqında tədbir iştirakçılarına ətraflı məlumat verdi. T.Nəsirovanın 85 və T.Babayevin 75 illik yubileylərinin keçirilməsi haqqında AMEA-nın Fizika-Riyaziyyat və Texnika Elmləri Bölməsi qarşısında vəsatət qaldırılması barədə qərar qəbul edildi.
İSİ-nin elmi katibi Zəhra Əzizova 1.3 saylı laboratoriyanın böyük elmi işçisi, r.ü.f.d. R.Zeynalovun “İdarəetmədə riyazi modellər və sərhəd məsələləri” adlı monoqrafiyası haqqında məlumat verdi, müzakirələr aparıldı və monoqrafiyanın çapa verilməsi haqqında yekdilliklə qərar qəbul edildi. Z.Əzizova, həmçinin İnstitutun laboratoriyalarının 2021-ci il üzrə elmi və elmi-təşkilatı fəaliyyəti haqqında hesabatların təqdimatı barədə məsələni tədbir iştirakçılarının diqqətinə çatdırdı və müəyyən tapşırıqlar verildi.
Sonra Ə.Sadıqov gənclər üçün elm və təhsil sahələri üzrə Prezident mükafatına nəmizədlərin təqdim olunması məsələsi ilə çıxış etdi, şura üzvləri tərəfindən müzakirələr aparılaraq qərarlar qəbul olundu.
İclasda İSİ-nin Təhsil şöbəsinin müdiri, r.ü.f.d. Sevinc Quliyeva 2021/2022-ci tədris ili üzrə İnstitutun magistraturasına qəbul olunan magistrantların dissertasiya mövzularının, elmi rəhbərlərinin və fərdi iş planlarının təsdiq olunması və gündəlikdən irəli gələn digər məsələlər barəsində çıxış etdi, fikir mübadiləsi aparıldı və qərarlar qəbul edildi.
Daha sonra Ə.Sadıqov İnstitutun 4 saylı laboratoriyasının kiçik elmi işçisi, İnstitutun 4-cü kurs dissertantı V.M.Haqverdiyevə dissertasiya mövzusunun dəqiqləşdirilməsi və yeni elmi rəhbərin təsdiq edilməsi haqqında məsələni şura üzvlərinin diqqətinə çatdırdı.
İclasda İdarəetmə Sistemləri İnstitutunda laboratoriya müdiri vəzifələrinə seçkilərlə bağlı şura üzvləri tərəfindən geniş müzakirələr aparıldı və gizli səsvermə keçirilərək müəyyən qərarlar qəbul edildi.
Sonra bəzi cari məsələlərə baxıldı və AMEA-nın Fizika-riyaziyyat və texnika elmləri bölməsinə veriləcək təkliflər səsə qoyuldu.
Sonda İnstitutun baş direktoru, akademik Əli Abbasov iclasa yekun vuraraq qarşıda duran əsas vəzifələrin yerinə yetirilməsi üçün müəyyən tapşırıqlarını səsləndirdi.