AMEA İdarəetmə Sistemləri İnstitutu və Belarus Tətbiqi Proqram Sistemləri İnstitutu arasında əməkdaşlıq memorandumu imzalanıb

26.11.2021 / Xəbərlər

24 noyabr 2021-ci il tarixində Belarus Respublikasının Rabitə və İnformasiyalaşdırma Nazirliyində “Tətbiqi Proqram Sistemləri İnstitutu” Elmi-Mühəndislik Respublika Unitar Müəssisəsi ilə Azərbaycan Milli Elmlər Akademiyası İdarəetmə Sistemləri İnstitutu arasında EU4Digital regionlararası proqramı çərçivəsində birgə pilot layihələrin konsepsiyasının hazırlanması və həyata keçirilməsi məqsədilə əməkdaşlıq memorandumu imzalanıb.

Memorandumu AMEA İdarəetmə Sistemləri İnstitutunun baş direktoru, akademik Əli Abbasov və Tətbiqi Proqram Sistemləri İnstitutunun direktoru İqor Mixaylovski imzalayıblar.

Tərəflər milli elektron logistika sistemlərinin və rəqəmsal nəqliyyat dəhlizlərinin (DTC) yaradılması yolu ilə nəqliyyat-logistika proseslərinin idarə edilməsi, rəqəmsallaşdırılması üzrə konsepsiyaların hazırlanması və birgə tədqiqat və layihələndirmə işlərinin həyata keçirilməsində əməkdaşlıq edəcəklərini ifadə ediblər.

Görüşdə, həmçinin elektron logistika sistemlərinin və DTC-lərin inkişafı sahəsində məlumat və təcrübə mübadiləsi, bu sahələr üzrə mövcud normativ sənədlər və texniki standartlar haqqında məlumat mübadiləsi barədə razılığa gəlinib.