“Vikipediyada Azərbaycan Həqiqətləri” mövzusunda tədbir keçirilib
31.12.2021 / Mühüm xəbərlər28 dekabr 2021-ci il tarixində Yeni Azərbaycan Partiyası (YAP) Yasamal rayon təşkilatı və “Qorqud Vikipediya Metodik klubu”nun birgə təşkilatçılığı ilə “Vikipediyada Azərbaycan Həqiqətləri” mövzusunda tədbir keçirilib.
Öncə Vətən uğrunda canlarından keçmiş şəhidlərin və Ümummilli Lider Heydər Əliyevin əziz xatirəsi bir dəqiqəlik sükutla yad edilib.
YAP Yasamal rayon təşkilatının sədri Bəxtiyar Nəbiyev tədbiri giriş nitqi ilə açaraq qeyd edib ki, Azərbaycan Şərq və Qərb mədəniyyətini özündə birləşdirən zəngin mədəni irsə malikdir. Azərbaycan həqiqətlərinin dünyaya çatdırılması, zəngin irsin qorunması baxımından bu qəbil təlimlərin mütəmadi şəkildə keçirilməsi xüsusi əhəmiyyətə malikdir.
Sonra millət vəkili Elnur Allahverdiyev çıxış edərək ermənilərin azərbaycanlılara aid ərazi adlarını saxtalaşdırmaları barədə danışıb və Azərbaycanın dünyaya tanıdılmasının vacibliyini vurğulayıb. Bildirib ki, hər bir azərbaycanlı Vətən qarşısında üzərinə düşən öhdəlikləri yerinə yetirməlidir. Məhz bu baxımdan informasiya cəbhəsində gənclərin aktivliyi xüsusi önəm kəsb edir. E.Allahverdiyev Azərbaycanda könüllülük hərəkatının geniş vüsət aldığını qeyd edərək “Qorqud” kimi platformaların əlverişli intellektual müstəvi olduğunu bildirib.
Daha sonra çıxış edən könüllü Ayxan Ziyadzadə Azərbaycanın tanınmasında vikipediyanın əhəmiyəti, “Qorqud” Vikipediya Metodik Klubu, 2021-ci ildə azad ensiklopediyadakı fəaliyyət barədə danışıb.
Sonra təlimdə fəal iştirak edən gənclərə fəxri fərmanlar təqdim olunub.
Daha sonra millət vəkilləri Ramin Həsən və Naqif Həmzəyev çıxış edərək vikipediada Azərbaycan barədə yer alan informasiyaların önəmini qeyd edib, klubun fəaliyyətinin və gənclərə bu təlimlərdə dəstək olmağın vacibliyini qeyd ediblər.
Qeyd edək ki, tədbirdə AMEA İdarəetmə Sistemləri İnstitutunun (İSİ) Gənc Alim və Mütəxəssislər Şurasının (GAMŞ) sədri, elmi işçi Lamiyə Nəcəfova da iştirak etmişdir.