Professor Ramin Rzayev elmi seminarda çıxış edib

26.01.2022 / Tədbirlər

25 yanvar 2022-ci il tarixində AMEA Riyaziyyat və Mexanika İnstitutunda (RMİ) İnstitutun direktoru, AMEA-nın müxbir üzvü Misir Mərdanovun rəhbərliyi ilə ümuminstitut seminarı keçirilmişdir. Tədbirdə RMİ-nin və İdarəetmə Sistemləri İnstitutunun (İSİ) rəhbəriyi və alimləri iştirak etdilər.

Seminarda İSİ-nin labotaroriya müdiri, t.e.d., professor Ramin Rzayev “Neyron şəbəkəli və qeyri-səlis modelləşdirmə üsullarının tətbiqi əsasında təhsil xidmətlərin rəqabətliyinin qiymətləndirilməsi və universitetlərin ranqlaşdırılması metodikası” mövzusunda məruzə ilə çıxış edib.

R.Rzayev çıxışında qeyd edib ki, əsas məqsəd keyfiyyət göstəricilərini nəzərə alaraq, universitetin fəaliyyətini qiymətləndirmək üçün meyarlar toplusunu formalaşdırmaq, onun əsasında universitetin hərtərəfli qiymətləndirilməsi üçün baza modellərini işləmək və ranqlaşdırılmanı təmin etməkdir. Alim təhsil xidmətlərinin keyfiyyətinin qiymətləndirilməsinə dair müxtəlif yanaşmalardan yanaşmalardan bəhs edərək reputasiya, ədədi və ümumi qiymətləndirmələr haqqında ətraflı məlumat verib.

Bildirib ki, universitetlərin reytinqi universitetin potensialı, universitetin fəaliyyəti və təhsilinin keyfiyyəti və beynəlxalq tanınma əsasında müəyyən olunur. Təqdim olunan tədqiqatda təhsil xidmətlərinin marketinq fəzasının və əmək bazarında universitetin rəqabət mövqeyinin qiymətləndirilməsi məqsədilə qeyri-səlis çıxarış sisteminə əsaslanan qeyri-səlis modellər işlənilmişdir. Aparılan tədqiqatlar çərçivəsində universitetlərin rəqabətlilik səviyyələrinə görə ranqlaşdırılması üçün reytinq sisteminin işlənməsinə dair neural-fuzzy yanaşma təklif edilmiş və sınaqdan keçirilmişdir.

Məruzə iştiraşçılar tərəfindən maraqla qarşılanmış və mövzu ətrafında müzakirələr aparılmışdır.