İdarəetmə Sistemləri İnstitutunda “Sabahın alimləri” müsabiqəsinin finalçıları təqdim etdikləri layihənin son sınağını keçiriblər
14.02.2022 / TədbirlərBu gün ümumtəhsil müəssisələrinin IX-XI siniflərində təhsil alan şagirdləri üçün keçirilən “Sabahın alimləri” Respublika Müsabiqəsi öz işinə başlayıb. Qeyd edək ki, bu müsabiqə 2012-ci ildən etibarən AR Təhsil Nazirliyi, Azərbaycan Milli Elmlər Akademiyası, Gənclər və İdman Nazirliyi, Heydər Əliyev Mərkəzi, Azərbaycan Təhsil İşçiləri Azad Həmkarlar İttifaqı Respublika Komitəsinin təşkilatçılığı ilə keçirilir.
2022-ci ilin 14-21 fevral tarixlərində keçiriləcək müsabiqənin final mərhələsində iştirak edəcək 189-190 saylı tam orta məktəbin komandasına AMEA İdarəetmə Sistemləri İnstitutunun (İSİ) laboratoriya rəhbəri, t.e.d., dosent Fəhrad Paşayev rəhbərlik edir. Sözügedən məktəbin şagirdləri - Ramil Tağıyev və Ziya Sadıqzadə Layihə üzərində son hazırlıq işlərini aparmaq məqsədilə İSİ-də olublar.
“Radiomodem vasitəsilə şifrələnmiş məlumatların ötürülməsi və qəbulu” adlı layihəni tədqim edən şagirdlər 44 günlük Vətən müharibəsi zamanı Azərbaycan Ordusu tərəfindən müasir intellektual informasiya texnologiyalarından geniş şəkildə istifadə olunmasının önəmini vurğulayaraq gələcək tədqiqatları ilə bu sahəyə töhfə vermək arzusunda olduqlarını ifadə ediblər. Qeyd olunub ki, layihədə məlumatların şifrələnməsi, RFD-900+ radiomodemi vasitəsilə ötürülməsi, digər kompüterdə məlumatın analoji radiomodem vasitəsilə qəbulu, deşifrasiya edilməsi və ekranda indikasiyasi həyata keçirilib. Prosesin gedişatı zamanı xüsusi alqoritm işlənib hazırlanıb. Layihə haqqında ətraflı məlumat verən şagirdlər alınan nəticələrin tətbiq sahələrindən söz açıblar.
Görüş çərçivəsində komandaya elmi rəhbərlik edən Fəhrad Paşayev layihə üzərində işin gedişatı barədə şagirdlərlə müzakirələr aparmış, öz fikir və tövsiyələrini bildirmiş və onlara uğurlar arzulamışdır.